काठमाडौं । काठमाडौं, ललितपुर र भक्तपुर तीनवटै जिल्ला प्रशासन कार्यालयले जारी गरेको निषेधाज्ञाका कारण काठमाडौं उपत्यका आज विहानैदेखि सुनसान बनेको छ । बुधबार राति १२ बजेदेखि नै लागू हुने गरी निषेधाज्ञा जारी गरिएपछि उपत्यका ठप्प बनेको हो ।
प्रहरीले अत्यावश्यक कामबाहेक मानिसलाई सडकमा निस्कन दिएको छैन । बिहान फाट्टफुट्ट खुलेका पसलहरु प्रहरीले माइकिङ गरी बन्द गराएको छ । अत्यावश्यक सेवाका गाडी एवं पसल भने सञ्चालनमा छन् । कतिपठ ठाउँमा भने स्थानीय प्रशासनले नै बिहान सात बजेसम्म किराना पसल खोल्न दिएको छ।
निषेधाज्ञाको कारण बिहीबार बिहानैदेखि काठमाडौं उपत्यकामा मानिसहरुको आवत जावत न्युन छ । सडकमा प्रहरीको संख्या बढाइएको छ । सडकमा गुड्ने सवारी साधन र अत्यावश्यक काममा पैदल हिँड्नेसँग पनि प्रहरीले सोधपुछ गरेर मात्र छाड्ने गरेका छन् । ठाउँठाउँमा प्रहरीले माइकिङ गर्दै निषेधाज्ञाको पालना गर्न अपिल गरिरहेको छ ।
अत्यावश्यक सेवा तथा वस्तु बाहेकका अन्य सबै प्रकारका व्यापाररव्यवसाय सञ्चालन गर्न पनि निषेध गरिएको छ । तीनबटै जिल्लाका स्थानीय प्रशासनले औषधि, खाद्यवस्तु तथा अन्य अत्यावश्यक उपभोग्यवस्तु वा सेवा खरिदको काममा बाहेक कसैलाई पनि घरबाट बाहिर ननिस्कन अपिल गरेका छन् । मर्निङ वाकमा समेत ननिस्कन अपिल गरिएको छ ।
अत्यावश्यक सामग्री लगायतका मालवाहक ढुवानीका सवारी साधन, स्वास्थ्यकर्मी तथा सुरक्षा निकायले प्रयोग गर्ने सवारी साधनबाहेक काठमाडौं उपत्यकाभित्र सवारी साधन प्रवेश गर्न, जिल्लाभित्र सबै प्रकारका निजी तथा सार्वजनिक यात्रुवाहक सवारीसाधन सञ्चालन गर्न पनि निषेध गरिएको छ ।
त्यस्तै फुटपाथ वा खुल्ला ठाउँमा र ठेलागाडा वा साइकलमा सञ्चालन हुने विभिन्न व्यवसाय सञ्चालन तथा कवाडी संकलन गर्न समेत बन्देज लगाइएको छ । निषेधाज्ञाको अवधिमा होटल, रेष्टुराँ सञ्चालन पनि गर्न पाइने छैन ।
कोरोना संक्रमण तीब्र गतिमा फैलिन थालेपछि काठमाडौं, ललितपुर र भक्तपुर जिल्ला प्रशासन कार्यालयले तीनैवटै जिल्लामा एक साताको लागि एकसाथ निषेधाज्ञा लागू गरेका हुन् ।
बुधबार मध्यरातिदेखि काठमाडौँ उपत्यकामा लकडाउन
