भरतपुर । स्वदेश र विदेशमा रहेका कतिपय नेपालीले चाहेर पनि परिवारसँगसँगै बसेर बडादसैँको टीका लगाउन पाउँदैनन् । कतिपय कार्यव्यस्तताले त कतिपय घरबाट टाढा भएकाले टीका थाप्नबाट वञ्चित हुन्छन् ।
कतिपय नागरिक भने स्वदेशमै रहेर पनि सेवा अवरुद्ध गर्न नहुने भएकाले परिवारका साथमा बसेर बडादसैँ मनाउन पाएका हुँदैनन् । स्वास्थ्य, सुरक्षालगायत अत्यावश्यक वस्तुको सेवा प्रवाह गर्नेहरू यसरी बडादसैँको टीका थाप्नबाट बञ्चित हुन्छन् ।
अरूको बडादसैँलाई सहज र सुरक्षित बनाई टीका लगाउन दिनका लागि सुरक्षा निकायमा खटिने टीका लगाउनबाट बञ्चित हुन्छन् ।
जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेल नब्बे प्रतिशत हाराहारी प्रहरी सेवामा रहेका घरमा गएर टीका थाप्नका लागि घर जान नपाउने बताउँछन् ।
उनले भने– ‘सर्वसाधारणले सुरक्षित चाडपर्व मनाउन् भनेर हामी परिवारसँग टीका लगाउन पाउँदैनौँ । यो कति वर्ष भन्ने होइन, कैयौँ वर्षसम्म पनि यस्तै हुने गरेको छ ।’
संवेदनशील जिल्लामा अन्यत्रबाट थप सुरक्षाकर्मी पठाएर सुरक्षा दिइने गरेको पनि उनले बताए । जिम्मेवारी लिएकाले बिदा पाउँदैनन् । अन्यले मिलाएर न्यूनतम सङ्ख्या मात्रै परिवारसँग बडादसैँ मनाउने उनले जानकारी दिए ।
त्यस्तै नेपाली सेना, सशस्त्र प्रहरी, राष्ट्रिय अनुसन्धानमा कार्यरत पनि यो पर्वमा परिवारसँग सबैले बडादसैँ मनाउन पाउँदैनन् ।
त्यसो त निजी क्षेत्रमा काम गर्ने सुरक्षा गार्डहरूले पनि बिदा नपाउने गरेको गढी सेक्युरिटीका सञ्चालक अश्विन गोले बताउँछन् ।
चाडपर्वको समयमा कतिपय उद्योगव्यवसाय बन्द हुने हुँदा सुरक्षाको जिम्मेवारी सुरक्षागार्डको हुने भएको बिदा नपाउने उनको भनाइ छ । उनले भने– ‘चाडपर्वमा सुरक्षा दिन थप जनशक्ति माग हुने गर्दछ ।’
भरतपुर अस्पतालका प्रमुख मेडिकल सुपरिटेन्डेन्ट डा विश्वबन्धु बगाले ३० प्रतिशत चिकित्सक, नर्स र स्वास्थ्यकर्मी अस्पतालमा नै रहने भएकाले उनीहरूले परिवारसँग बडादसैँको टीका थाप्न नपाउने बताउँछन् ।
बहिरङ्ग सेवाबाहेक आकस्मिक र अन्तरङ्ग सेवा सुचारु हुने भएकाले चिकित्सक, स्वास्थ्यकर्मी र सरसफाईकर्मी बिदा बस्न नपाउने उनको भनाइ छ ।
उनीहरूले बडादसैँ र तिहार पालो मिलाएर बिदा लिने गर्दछन् । बगालेले भने– ‘जुनसुकै बेला सेवा दिनुपर्ने भएकाले तयारी अवस्थामा हुनुपर्छ ।’
पर्वको समयमा अधिकांश समय नर्सिङ कर्मचारीले समय दिने गर्दछन् । नेपाल नर्सिङ सङ्घ चितवनका अध्यक्ष विष्ण्ॉ अधिकारी ५० प्रतिशत नर्सले बिदा लिएर बस्न नपाउने बताउँछन् ।
उनले भने– ‘बडादसैँ र तिहारमध्ये आलो पालो गरेर बिदा मिलाइन्छ ।’ यसका कारण ५० प्रतिशत नर्सले बडादसैँमा परिवारसँग टीका थाप्न नपाउने उनको भनाइ छ ।
विदेशमा ठुलो सङ्ख्यामा नेपाली छन् । उनीहरूमध्ये अधिकांशले परिवारसँग बसेर टीका लगाउन पाउँदैनन् । कतिपयले एकाघरको परिवारलाई उतै बोलाउँछन् भने कतिपयले बिदा मिलाएर बडादसैँमा नेपाल आउने गर्दछन् ।
चार वर्षपछि बुबा आमाको हातबाट टीका लगाउन चितवनको रत्ननगर आएका विष्ण्ॉ पौडेल पर्वमा परिवारसँग बस्न पाउनु निकै खुसीको कुरा हुने बताउँछन् । उनले भने– ‘विदेशमा रहनेले परिवारसँग कमैले मात्र पर्व मनाउन पाउँछन् ।’
यस्तै अन्य क्षेत्रमा पेसा गर्नेहरू पनि टीका लगाउनबाट वञ्चित हुन्छन् । सञ्चार क्षेत्र, यातायत, सरसफाइ, हस्पिटलिटी क्षेत्रमा काम गर्ने पनि सबैले परिवारसँगै बसेर टीका थाप्न पाउँदैनन् । आलो पालो गरेर उनीहरूले काम गर्छन् । (रासस)
