काठमाडौँ — मलेसियाले सन् २०२७ जुनदेखि लागू हुने गरी श्रमिकको न्यूनतम मासिक तलब १ हजार ७ सयबाट बढाएर २ हजार रिंगिट पुर्‍याउने घोषणा गरेको छ। प्रधानमन्त्री अनवर इब्राहिमले सन् २०२७ को बजेट प्रस्तुत गर्दै उक्त घोषणा गरेका हुन्। यसबाट ४० लाखभन्दा बढी श्रमिक लाभान्वित हुने बताइएको छ।

नयाँ न्यूनतम तलबको व्यवस्था नेपालीसहित विदेशी श्रमिकमा पनि लागू हुनेछ। तर वार्षिक कारोबार ५ करोड रिंगिटभन्दा कम भएका सूक्ष्म, साना तथा मझौला उद्यमलाई भने छुट दिइनेछ।

त्यसैगरी, अर्धदक्ष श्रमिक र विश्वविद्यालयबाट उत्तीर्ण स्नातकका लागि सुरुआती मासिक तलब कम्तीमा २ हजार ५ सय रिंगिट निर्धारण गर्ने योजना पनि सरकारले अघि सारेको छ। तलब वृद्धि र पारिश्रमिक संरचनामा सुधार गरी श्रमिकको जीवनयापन सहज बनाउने सरकारको उद्देश्य छ।

मलेसियामा ठूलो संख्यामा नेपाली श्रमिक कार्यरत रहेकाले न्यूनतम तलब वृद्धिबाट उनीहरू पनि लाभान्वित हुने अपेक्षा गरिएको छ।