काठमाडौँ । सर्वोच्च अदालतमा प्रधानन्यायाधीश डा मनोजकुमार शर्माको स्वेच्छाचारिताको अर्का न्यायाधीश हरि फुयालले विरोध गरेका छन् ।
संवैधानिक इजलास गठनमा प्रधानन्यायाधीशले स्वेच्छाचारिता देखाएको भन्दै न्यायाधीश फुयालले विरोध गरेका हुन् ।
न्यायाधीश फुयालको विरोधका कारण असोज २१ गतेको सर्वोच्चको संवैधानिक इजलास बस्न सकेको छैन ।
प्रधानन्यायाधीश डा. शर्माले यसअघि संवैधानिक इजलासमा न्यायाधीश फुयाललाई राखेका थिएनन् तर असोज २१ गतेको इजलासमा उनलाई राख्ने भए पनि न्यायाधीश फुयालले प्रधानन्यायाधीशलाई भेटेर बस्न अस्वीकार गरेका छन् ।
स्रोतका अनुसार विगतमा किन राखिएन र आज मेरो के आवश्यकता पर्यो भन्दै न्यायाधीश फुयालले प्रधानन्यायाधीशलाई प्रश्न गरेको बताइएको छ ।
न्यायाधीश फुयाल बस्न नमानेपछि अन्य न्यायाधीशहरू पनि इजलासमा बस्न तयार भएनन् । त्यसैले असोज २१ गतेको संवैधानिक इजलास बस्न सकेन । संवैधानिक इजलासमा प्रधानन्यायाधीशसहित पाँच जना न्यायाधीश रहने व्यवस्था छ ।
इजलास गठनमा वरिष्ठताक्रम वा गोला प्रथाको वैज्ञानिक विधि हुनुपर्ने उनको अडान छ । प्रधानन्यायाधीशले मनखुसी प्रकारले संवैधानिक इजलास गठन गर्न नहुने न्यायाधीश फुयालको धारणा रहेको बताइएको छ ।
सर्वोच्च अदालतभित्र न्यायाधीशको इजलास गठन र जिम्मेवारी बाँडफाँटलाई लिएर पछिल्लो समय असन्तुष्टि देखिँदै आएको छ । यसअघि पनि संवैधानिक इजलासमा न्यायाधीशको राय बाझिएका घटना सार्वजनिक भएका छन् ।