ब्राटिस्लाभा, १४ असोज । स्लोभाकियाको अर्थतन्त्र सन् २०२६ मा शून्य दशमलव ८ प्रतिशत र सन् २०२७ मा एक दशमलव ८ प्रतिशतले बढ्ने प्रक्षेपण गरिएको छ । स्लोभाकियाको अर्थ मन्त्रालयले मंगलबार सार्वजनिक गरेको पछिल्लो आर्थिक प्रक्षेपणमा यस्तो अनुमान गरिएको हो ।
अन्तर्राष्ट्रिय व्यापारमा देखिएको तनाव, ऊर्जा संकट, अमेरिकी कर तथा युरोपेली संघमा घट्दो प्रतिस्पर्धात्मकताजस्ता चुनौतीका बाबजुद अर्थतन्त्रमा सामान्य सुधार आउने मन्त्रालयले जनाएको छ ।
घरायसी उपभोग र निर्यातमा सुधारले आर्थिक वृद्धिलाई सहयोग गर्ने अपेक्षा गरिएको छ । स्लोभाकियामा भोल्भोको कार कारखानामा उत्पादन विस्तार हुँदै जानुले पनि अर्थतन्त्रलाई थप बल दिने अनुमान गरिएको छ ।
मुद्रास्फीति पनि घट्ने अपेक्षा गरिएको छ । यस वर्ष ३.७ प्रतिशत रहेको वार्षिक मुद्रास्फीति सन् २०२७ मा २.९ प्रतिशतमा झर्ने अनुमान गरिएको छ । घरपरिवारका लागि ऊर्जा सहायता कार्यक्रमलाई निरन्तरता दिइनुले पनि मूल्यवृद्धि नियन्त्रणमा सहयोग पुग्ने मन्त्रालयले जनाएको छ ।
यसैगरी, नागरिकको वास्तविक आम्दानीमा पनि सुधार आउने अपेक्षा गरिएको छ । यस वर्ष औसत नाममात्रको तलब ४.५ प्रतिशतले बढ्ने र मुद्रास्फीतिको प्रभाव समायोजन गरेपछि वास्तविक तलब अर्को वर्ष एक दशमलव ४ प्रतिशतले बढ्ने अनुमान गरिएको छ ।
आर्थिक सहयोग तथा विकास संगठनले सन् २०२७ मा युरो क्षेत्रको आर्थिक वृद्धिको अनुमान एक दशमलव २ प्रतिशतबाट घटाएर एक प्रतिशतमा झारेको छ । फ्रान्स र जर्मनीको आर्थिक वृद्धि क्रमशः शून्य दशमलव ७ प्रतिशत र एक दशमलव १ प्रतिशत रहने अनुमान गरिएको छ ।
स्लोभाकियाको अर्थ मन्त्रालयअन्तर्गतको वित्तीय नीति संस्थानले आर्थिक प्रक्षेपणमा रहेका जोखिमलाई सामान्य रूपमा सन्तुलित रहेको जनाएको छ । ऊर्जा मूल्य उच्च रहिरहेमा आर्थिक गतिविधिमा असर पर्नुका साथै सरकारी वित्तमा दबाब पर्न सक्ने बताइएको छ । त्यस्तै, सैन्य द्वन्द्व र व्यापार अवरोधसम्बन्धी अनिश्चितताले निर्यातमा सुधार ढिलो गराउन र आर्थिक वृद्धिमा असर पार्न सक्ने मन्त्रालयले जनाएको छ ।
