रवि पौडेल ##

सबै भन्छन् तिज आयो तिज आयो भनेर
तिज छैन बस्छु म त दिन गनेर

गैरीखेत सानो घर बगाइदियो बाढीले
वृद्ध भ’का बालाई पनि हान्यो गाडीले

माटोमुनि हराएकी आमा आउँछिन् कहिले
राहतको हात थाप्न पर्‍यो अहिले

चारैतिर राहतको थुप्रै थुप्रो ला’को छ
कहाँ बस्ने के खाने दु:ख भा’को छ

घर दिन्छ कि पैसा दिन्छ सरकारले थाहा छैन
एक दुई लाख पैसा अहिले नभई भा’छैन

सङ्घसंस्थाले रासन दिए पकाएर खानलाई
बास छैन लिई गई पकाई खानलाई

के विचल्ली आइपर्‍यो नेपाली जनतालाई
सरकारको गुनगान त गाउँछन् गाउनलाई

सरकारले व्यवस्थापन गर्छ कि गर्दैन
पैसा थुप्रै आएको छ भन्नै पर्दैन

धेरै क्षति धेरै दु:ख जनताले पाएको
के गर्दैछौ राहतस्वरूप पैसा आएको

जनताका राहतका पोका छिटो फुकाउनू
विश्वभरले पैसा दिएको किन लुकाउनू ?