दीप गोले तामाङ ##

साम्राज्यवाद
अदृश्य रूपमा उदाएको थियो–
भ्रष्टाचारको विरुद्ध
आँधीतुफान बनेर
आँखामा आक्रोशको ज्वाला दन्काएर
निराशाले निचोरिएका युवाको मनमा
आगोको रापले सेकेर
सडकभरि कुल्र्याएको थियो–
एउटा भिड
सिंहदरबार
संसद् भवन
सर्वोच्च अदालत
तोडफोड, आगजनीले
सिङ्गो देश कालो धुवाँमा डुबाएर

जितको कफन बाँधेर
कोमल हातले फलामको सिक्री कसिँदैछ
लोकतन्त्रको ज्योति निभाएर
तारा देखाउँदैछ
झुटा सपनाहरू बाँडियो
जनतालाई सुखशान्तिको मन्त्र जप्न लगाएर
महँगीले घाँटी निचोरिरहेछ
चुलोहरू निभिरहेका छन्
उद्धार र राहत छैन,
भोकै मर्ने अवस्था छ
लास अझै बेपत्ता छन्

सहिदहरू
घाइतेहरू
सरकारसँग प्रश्न गरिरहेका छन्–
खोइ हामीलाई न्याय?
यो सरकार भने
आज भदौ २३
सहिद दिवस मनाइरहेछ