जुना भण्डारी चालिसे
नयाँ कानुन, नयाँ नियम लेखौँ भन्ने चाहना
छोरीचेली बचाउन पाऊँ शुभकामना ।१।
लक्ष्मी भनी पूजा गरे, नारी भनी बुझेनन्
नारीको चीत्कार सुनेर पनि सुनेनन् ।२।
सरस्वतीको रूप भनी पूजा गर्ने नारीलाई
दाइजोको नाममा मर्नुपर्छ हामीलाई ।३।
विवाह गरी प्रवेश गर्दा लक्ष्मी भनी भित्र्याउने
तिनै लक्ष्मी केही दिनमै घरमै सिध्याउने ।४।
जसको हातमा शासनसत्ता, उसैको ठुलो हात
हारगुहार माग्दामाग्दै जान्छ बरै सास ।५।
सडकदेखि सदनसम्म महिला अघि सार्दैछन्,
तर पनि महिलामाथि दमन गर्दैछन् ।६।
वर्षौँदेखि कुर्सी कुरिबस्नेलाई पनि देखियो
नारीमाथि अन्यायको गीत लेखियो ।७।
सुन्दर संसार देख्ने आँखा निकालेर फालियो
हाम्रो देशमा बलात्कारी किन पालियो ।८।
नाबालक भनी किन पालनपोषण गरिन्छ ?
फाँसीको त कानुन छैन, चेली मरिन्छ ।९।
मुटु काम्नेजस्ता घटना दिनदिनै बढ्दैछन्
केही पुरुष मानव होइन, दानव बन्दैछन् ।१०।
कहाँ होला नारीचेली सुरक्षित हुने ठाउँ ?
यस्तै भए मरिनेछ नारीको नै नाम ।११।
न त घरमै राख्न मिल्ने, न अटाउने गोजीमा
छोरीचेली बचाउन लागौँ खोजीमा ।१२।
नयाँ नियम, नयाँ कानुन, संविधान फेर्नुछ
अपराधीलाई फाँसी सजाय भएको हेर्न छ ।१३।
