काठमाडौँ । उपसभामुख रुबी ठाकुरले जनआस्थाका प्रधान सम्पादक किशोर श्रेष्ठविरुद्ध जिल्ला प्रहरी परिसर ललितपुरमा जाहेरी दिएकी छन्। आफ्नो चरित्र, प्रतिष्ठा र सामाजिक मर्यादामा आँच पुग्नेगरी अनलाइन सामग्री प्रकाशित गरेको भन्दै ठाकुरले विद्युतीय कारोबार ऐन, २०६३ अन्तर्गत अनुसन्धान र कारबाहीको माग गरेकी हुन्।

ललितपुरका एसएसपी तुलबहादुर कार्कीले जाहेरी प्राप्त भएको पुष्टि गर्दै प्रहरीले अध्ययन गरिरहेको बताएका छन्।

यसअघि सांसद अमरकान्त चौधरीसँग सम्बन्धित सामग्री प्रकाशन गरेको प्रकरणमा श्रेष्ठ पक्राउ परेका थिए। सर्वोच्च अदालतको आदेशपछि उनी रिहा भएका छन्। उक्त प्रकरणमा उनीविरुद्ध वैयक्तिक गोपनीयतासम्बन्धी कसुरमा अनुसन्धान भइरहेको थियो।