नयाँ दिल्ली। लद्दाखका सामाजिक अभियन्ता सोनम वाङ्चुकलाई दिल्ली प्रहरीले शनिबार बिहान जंतर–मंतरस्थित अनशनस्थलबाट नियन्त्रणमा लिएर सफदरजंग अस्पतालमा भर्ना गरेको छ। लगातार २० दिनदेखि आमरण अनशनमा बसेका वाङ्चुकलाई उपचारका लागि अस्पताल सारिएको प्रहरीले जनाएको छ।

दिल्ली प्रहरीले उच्च अदालतको आदेश, चिकित्सकहरूको सल्लाह र वाङ्चुकको बिग्रँदै गएको स्वास्थ्य अवस्थालाई मध्यनजर गर्दै उनलाई सरकारी अस्पतालमा स्थानान्तरण गरिएको जनाएको छ। प्रहरीले आन्दोलनकारीमाथि लाठीचार्ज नभएको दाबी गर्दै अदालतको निर्देशनअनुसार आवश्यक स्वास्थ्य सुरक्षा अपनाइएको स्पष्ट पारेको छ।

यद्यपि, आन्दोलन पक्षले भने प्रहरीले वाङ्चुकलाई जबर्जस्ती उठाएर लगेको आरोप लगाएको छ। वाङ्चुककी पत्नी गीताञ्जली आङ्मोले सामाजिक सञ्जाल ‘एक्स’मार्फत आफ्नो अनुमति, परिवारको सहमति तथा विगत २० दिनदेखि स्वास्थ्य निगरानी गरिरहेका चिकित्सकहरूको सल्लाहबिना वाङ्चुकलाई मुख वा नसामार्फत कुनै पनि औषधि वा तरल पदार्थ नदिन आग्रह गरेकी छन्।

‘कोकरो जनता पार्टी’ले प्रहरीले आन्दोलनमा सहभागी विद्यार्थीमाथि बल प्रयोग गरेको तथा आफ्ना संस्थापक अभिजीत दीपमाथि कुटपिट गरेको आरोप लगाएको छ। अभिजीत दीपले आफूलाई पनि प्रहरीले नियन्त्रणमा लिएर दुर्व्यवहार गरेको दाबी गरेका छन्। साथै, पार्टीले दीपले पनि अनिश्चितकालीन आमरण अनशन सुरु गर्ने घोषणा गरेको छ। जुलाई २० मा तय गरिएको ‘चलो संसद’ मार्च पूर्वनिर्धारित कार्यक्रमअनुसार नै हुने पार्टीले जनाएको छ।

वाङ्चुकलाई अनशनस्थलबाट हटाइएपछि विभिन्न राजनीतिक दलका नेताहरूले सरकारको आलोचना गरेका छन्। आम आदमी पार्टीका राज्यसभा सांसद सञ्जय सिंहले आन्दोलनकारीका माग सम्बोधन गर्नुको सट्टा जबर्जस्ती अस्पताल लगाइएको आरोप लगाए। समाजवादी पार्टीकी सांसद डिम्पल यादवले लोकतान्त्रिक अधिकारमाथि हस्तक्षेप भएको टिप्पणी गरिन् भने शिवसेना (उद्धव ठाकरे समूह) का नेता आदित्य ठाकरेले सरकारले शान्तिपूर्ण आन्दोलनसमेत सहन नसकेको आरोप लगाए।

यसअघि जुलाई १६ मा दिल्ली उच्च अदालतले वाङ्चुकको स्वास्थ्य अवस्थामाथि निरन्तर निगरानी राख्न सरकारलाई निर्देशन दिएको थियो। अदालतले चिकित्सकहरूको रायका आधारमा आवश्यक निर्णय लिन सम्बन्धित निकायलाई आदेश दिएको थियो।

अनशनका क्रममा सार्वजनिक गरिएको भिडियो सन्देशमा वाङ्चुकले आफ्नो शरीरको करिब २० प्रतिशत तौल घटिसकेको भए पनि मानसिक अवस्था सामान्य रहेको बताएका थिए। उनले शरीरको बोसो र मांसपेशी घट्दै गएको उल्लेख गर्दै आफ्नो आन्दोलन जारी रहने बताएका थिए।

जंतर–मंतर क्षेत्रमा हाल सुरक्षा व्यवस्था कडा पारिएको छ। ठूलो संख्यामा प्रहरी परिचालन गरिएको छ। वाङ्चुक जुन २८ देखि विभिन्न माग राख्दै आमरण अनशनमा बसेका हुन्। शनिबार उनको अनशन २१औँ दिनमा प्रवेश गरेको थियो।