वासिङ्टन । अमेरिकामा गरिएको नयाँ जनमत सर्वेक्षणले अधिकांश अमेरिकी नागरिकले इरानविरुद्ध युद्ध सुरु गर्ने निर्णयलाई गलत मानेको देखाएको छ।

YouGov र The Economist द्वारा गरिएको सर्वेक्षणअनुसार ५७ प्रतिशत उत्तरदाताले इरानविरुद्ध युद्ध सुरु गर्नु गलत निर्णय भएको बताएका छन्। त्यसैगरी २७ प्रतिशतले भने उक्त निर्णय सही भएको प्रतिक्रिया दिएका छन्।

सर्वेक्षणले युद्धको अवधि सम्बन्धी जनधारणासमेत सार्वजनिक गरेको छ। त्यसअनुसार ४६ प्रतिशत अमेरिकीले यो युद्ध अझै एक वर्ष वा सोभन्दा बढी समयसम्म जारी रहने विश्वास व्यक्त गरेका छन्।

यता, युद्ध एक महिनाभित्र समाप्त हुने वा पहिले नै सकिएको ठान्ने अमेरिकीको संख्या उल्लेखनीय रूपमा घटेको छ। मार्च महिनामा यस्तो धारणा राख्नेको अनुपात २० प्रतिशत रहेकोमा अहिले घटेर ८ प्रतिशतमा सीमित भएको सर्वेक्षणले देखाएको छ।

सर्वेक्षणका नतिजाले इरानसँगको युद्धप्रति अमेरिकी जनमत बढ्दो रूपमा नकारात्मक बन्दै गएको र युद्ध लामो समयसम्म लम्बिन सक्ने चिन्ता नागरिकमा रहेको संकेत गरेको छ।