बेइजिङ, जेठ २८ । परराष्ट्रमन्त्री शिशिर खनालको आसन्न चीन भ्रमणलाई लक्षित गर्दै बेइजिङस्थित नेपाली दूतावासले तयारी तीव्र पारेको छ। मन्त्री खनाल जेठ ३१ गते चीन पुग्ने कार्यतालिका रहेको छ, यद्यपि भ्रमणबारे औपचारिक घोषणा भने हुन बाँकी छ।
भ्रमणका क्रममा मन्त्री खनालले चीनमा रहेका नेपाली समुदायसँग अन्तरक्रिया गर्नुका साथै चाइना एकेडेमी अफ साइन्सका प्रतिनिधिहरूसँग शिक्षा, विज्ञान र प्रविधि क्षेत्रमा सहकार्यबारे छलफल गर्ने कार्यक्रम छ।
उनले चिनियाँ विदेशमन्त्री वाङ यी तथा चिनियाँ कम्युनिस्ट पार्टीका विदेश विभाग प्रमुखसँग उच्चस्तरीय भेटवार्ता गर्नेछन्। भेटमा नेपाल–चीन सम्बन्ध, बिआरआई अन्तर्गतका परियोजना, लगानी विस्तार तथा लिम्पियाधुरा, लिपुलेक र कालापानी क्षेत्रसँग सम्बन्धित विषयमा समेत कुराकानी हुने अपेक्षा गरिएको छ।
असार २ गते आयोजना हुने लगानी सम्मेलनमा पनि मन्त्री खनाल सहभागी हुनेछन्, जहाँ नेपालमा चिनियाँ लगानीका सम्भावित क्षेत्रबारे छलफल हुनेछ।
भारत भ्रमण सम्पन्न गरी हालै स्वदेश फर्किएका मन्त्री खनाल चीन भ्रमण सकेर असार ३ गते नेपाल फर्किने कार्यक्रम रहेको छ।
