काठमाडौँ । छ किसान सङ्गठनले प्रधानमन्त्री बालेन्द्र शाहले राष्ट्रघाती अभिव्यक्ति दिएको भन्दै माफी माग्नुका साथै राजीनामा दिन माग गरेको छ ।
२०८३ जेठ २५ गते सोमबार संयुक्त प्रेसवक्तव्य जारी गर्दै उनीहरूले सो माग गरेका हुन् ।
वक्तव्यमा उनीहरूले सुकुम्वासी बस्तीमा डोजर चलाउने, विद्यार्थी सङ्गठन र ट्रेड युनियनमाथि प्रतिबन्ध लगाउने, शिक्षा, स्वास्थ्य र विद्युत्मा भ्याट लगाउनेजस्ता क्रियाकलापको उदाहरण दिँदै उनीहरू सरकारलाई जनविरोधी भइसकेको निष्कर्ष निकालेका छन् ।
जेठ १७ गते प्रतिनिधिसभामा प्रधानमन्त्री शाहको नेपालले पनि भारतको सीमा मिचेकोसम्बन्धी अभिव्यक्तिको उदाहरण दिँदै उनीहरूले वक्तव्यमा यसबाट भारतीय शासक वर्गलाई मदत पुग्ने, नेपाल राष्ट्र र नेपाली जनताको स्वाभिमानमाथि गम्भीर आँच पुग्ने बताएका छन् ।
वक्तव्यमा उनीहरूले भनेका छन्– “प्रधानमन्त्री बालेन्द्र शाहले संसद्को रोस्ट्रममा उभिएर दिएको नेपालले पनि धेरै ठाउँमा भारतको सीमा मिचेको भन्ने आधारहीन, कपोलकल्पित, कायरतापूर्ण र आत्मसमर्पणवादी अभिव्यक्ति घोर निन्दनीय छ ।”
प्रधानमन्त्री शाहको सो अभिव्यक्तिबापत् उनीहरूले उक्त अभिव्यक्ति फिर्ता लिन तथा आम जनतासमक्ष माफी माग्दै राजीनामा दिन जोडदार माग गरेका छन् ।
वक्तव्यमा अखिल नेपाल किसान महासङ्घ (अप्फा) का अध्यक्ष भैरवराज रेग्मी, अखिल नेपाल किसान महासङ्घ (क्रान्तिकारी केन्द्र) का अध्यक्ष चित्रबहादुर श्रेष्ठ, अखिल नेपाल किसान महासङ्घका संयोजक बलदेव चौधरी, क्रान्तिकारी किसान महासङ्घ नेपालका अध्यक्ष सीताराम तामाङ, अखिल नेपाल प्रगतिशील किसान सङ्घका अध्यक्ष रामदुलार महतो र नेपाल प्रगतिशील किसान सङ्घका अध्यक्ष दुर्गाप्रसाद जैसीको हस्ताक्षर रहेको छ ।
