भीष्म जोशी ##

मलाई लुक्न देऊ
तिम्रा अधेरी रातसरी केशराशीमा
अनि डुब्न देऊ
तिम्रो मुस्कानको आभामा

आत्तिन देऊ
मात्तिन देऊ
चिड्चिढाउन देऊ
तिमीसँगको
गहिरो प्रेममा, प्रिय !

व्यक्त गर्नै सकिन्न त
तिम्रो प्रेमको गहिराइ
नाप्नै सक्दिन त
कठोर ढुङ्गाभित्र छौ
कसरी भेटूँ ?

सूक्ष्म छौ र पो विराट छौ
पढ्नै सकिन, बुझ्नै सक्दिनँ त
कसरी बुझूँ ?
तिमी को हौ ? ज्ञान वा प्रज्ञा

अहम् ब्र्रह्मास्मी
माया, प्रेम, आत्मा, मोक्ष
नेति–नेति वा त्योभन्दा भिन्न
द्रष्टा, स्रष्टा वा महाकाल

यस्तै यस्तै
भिन्न वा अद्वैत
भोक, प्यास, नशा कि अतृप्त–तृष्णा
आँधी–तुफान कि उडान

भ्रम वा शून्य
विचित्र
एक वा अनेक
अनेकभित्रको एक

रहस्य
सुन्दर, शान्त र विराट
प्रज्ञा
तिमी र तिमीसँको अप्राप्य प्रेम

(२०८३ जेठ २२ गते)