काठमाडौँ । प्रगतिशील लेखक सङ्घले राष्ट्रियता र वर्तमान समकालीनताबारे कवितागोष्ठी सम्पन्न गरेको छ । केन्द्रीय समितिको आयोजनामा २०७७ साउन १७ गते भर्चुअल माध्यमबाट सो कार्यक्रम सम्पन्न भएको हो ।
“कवितामा राष्ट्रियता र समकालीन स्वर” शीर्षक दिइएको उक्त कार्यक्रमको प्रमुख अतिथि हुनुहुन्थ्यो, वरिष्ठ साहित्यकार कुन्ता शर्मा । कार्यक्रममा मन्तव्य राख्दै प्रमुख अतिथि शर्माले अहिले राष्ट्रिय सहमतिको स्वरूपमा राष्ट्रियताको विषयमा आवाज उठ्नु इतिहासमा विरलै घट्ने घटना भएको बताउनुभयो । नेपाल कहिल्यै पनि कसैको गुलाम नरहेको बताउँदै उहाँले अहिलेका शासकहरूमा भने कमारोपनले घर गरेको बताउनुभयो । ‘अहिलेका शासकहरूको मनमा कमारोपन बसेको पाइयो’ प्रमुख अतिथि शर्माले भन्नुभयो– ‘तर हामी साहित्यकारहरू माथि सत्तातिर हेर्दैनौँ, बरु तल जनतातिर हेर्दछौँ । त्यसैले हामीले शासकवर्गको कमारोपनप्रति दिग्दारी लाग्दछ ।’ तर प्रगतिशील साहित्यकारहरू राष्ट्र, राष्ट्रियता र जनताको पक्षमा लगातार बोलिरहने प्रतिबद्धता पनि व्यक्त गर्नुभयो ।
कार्यक्रममा समीक्षात्मक मन्तव्य राख्दै प्रा.डा. हेमनाथ पौडेलले कविता आफैमा समालोचना भएको बताउनुभयो । गोष्ठीमा वाचित कवितामा आलोचनात्मक चेत प्रखर रहेको बताउँदै उहाँले कविताहरू विचार र कलाको संयोजनसहित आएको पनि उल्लेख गर्नुभयो । अर्का समालोचक साहित्यकार सीता शर्माले सामाजिक दायित्वबोधअनुसार कविता प्रस्तुत भएको बताउनुभयो । वर्गीय पक्षधरता, राष्ट्रियता, स्वजागरण, समकालीनता सबै विषय समेटिएको बताउँदै उहाँले कवितामा अग्रजले उदीयमानबाट र उदीयमानबाट अग्रजबाट सिक्नुपर्ने बताउनुभयो ।
केन्द्रीय अध्यक्ष प्रा.डा. जीवेन्द्र देव गिरीले समेत मन्तव्य राख्नुभएको उक्त कार्यक्रमको उद्घाटन प्रमुख अतिथि कुन्ता शर्माले कविता वाचन गर्दै गर्नुभएको थियो । कार्यक्रममा अनिता लामा, डा. अमर गिरी, कल्पना पौडेल, कुमारी महरा, डा. गोविन्द आचार्य, जीवन स्पर्शी, तिला लेकाली, देवेन्दसक्तेन राई, नदीराम केसी, पोषराज पौडेल, प्रियङ्का झा, बुँद राना, भीम क्षेत्री, मीन राना, युगिन विवेक, युद्धविक्रम शाही, ऋतु केसी, लक्षिराम आचार्य, शान्ति प्रियवन्दना, सरु बस्नेत र हरिश ओलीले कविता वाचन गर्नुभएको थियो ।
केन्द्रीय कोषाध्यक्ष तथा कवितागोष्ठीसम्बन्धी उपसमितिका संयोजक प्रा.डा. धु्रवकुमार घिमिरेको अध्यक्षता तथा केन्द्रीय सचिव प्रकाश थापा मगरको सञ्चालनमा अघि बढेको सो कार्यक्रममा उपस्थित सहभागीलाई केन्द्रीय सदस्य शालिकराम तिमिल्सिनाले स्वागत गर्नुभएको थियो ।
