बुटवल, जेठ ३ । भूमिहीन, सुकुम्बासी तथा अव्यवस्थित बसोबासीहरूले आइतबार बुटवलमा प्रदर्शन गर्दै बस्ती हटाउने सरकारी अभियानको विरोध गरेका छन्। नेपाल भूमिहीन सुकुम्बासी तथा अव्यवस्थित बसोबासी संघर्ष समितिको आयोजनामा भएको प्रदर्शनमा विभिन्न जिल्लाबाट आएका सहभागीहरूले “पहिला पुनःस्थापना, अनि मात्रै हटाउने” माग अघि सारेका थिए।
प्रदर्शन बुटवलको मुख्य चौराहाबाट सुरु भई विभिन्न क्षेत्र परिक्रमा गर्दै सभामा परिणत भएको थियो। सहभागीहरूले वैकल्पिक व्यवस्था बिना आफूहरूलाई हटाउन खोजिएको भन्दै सरकारविरुद्ध नाराबाजी गरेका थिए। प्रदर्शनका कारण केही समय बुटवलका क्षेत्र प्रभावित बनेका थिए भने सुरक्षाका लागि प्रहरी परिचालन गरिएको थियो।
सभालाई सम्बोधन गर्दै नेकपा (माओवादी) रुपन्देही जिल्ला सेक्रेटरी बिरेन्द्र सिले भूमि समस्या समाधान नभएसम्म आन्दोलन जारी रहने बताए। संघर्ष समितिले राष्ट्रिय भेलामार्फत आगामी आन्दोलनका कार्यक्रम सार्वजनिक गरिने जनाएको छ।
