दाङ । राष्ट्रिय जनमोर्चा दाङले सुरक्षासम्बन्धी मापदण्ड पूरा नगरी सार्वजनिक यातायातमा बढी भाडा उठाइएकोमा विरोध प्रकट गरेको छ । राजमो दाङले यस सम्बन्धमा दाङका प्रमुख जिल्ला अधिकारी गोविन्द रिजाललाई भेटी ध्यानाकर्षणसमेत गराएको जानकारी गराएको छ ।
राजमो दाङका अध्यक्ष गणेश आचार्यको हस्ताक्षरमा २०७७ साउन १२ गते जारी प्रेसवक्तव्यमा यस्तो विरोध उल्लेख गरिएको हो । वक्तव्यमा अगाडि भनिएको छ :
“अहिले कोरोना भाइरसको सङ्क्रमण नरोकिइसकेको अवस्था हामी सबैलाई जगजाहेर नै छ । त्यसो हँुदाहुँदै पनि जनजीवनलाई सहज गराउनका लागि सार्वजनिक यातायात सुरु भएको छ । यो ठिकै भएको छ । तर सार्वजनिक यातायातका साधनमा असावधानीपूर्वक चर्काे भाडा लिएर असुरक्षित तरिकाले यात्रु ओसारपसार गरेको कुराप्रति हाम्रो पार्टी राष्ट्रिय जनमोर्चाको गम्भीर ध्यानाकर्षण भएको छ ।
यही विषयमा आजै प्रमुख जिल्ला अधिकारी गोविन्द रिजाललाई भेटी यो अवस्थाको बारेमा ध्यानाकर्षण गराउने कामसमेत हाम्रो पार्टीले गरेको छ । गाडीमा सुरक्षा सामग्रीको प्रयोग गरिएको पनि छैन । भौतिक दुरी कायम गरिएको पनि छैन । सुरक्षा सामग्री प्रयोग गर्ने र भौतिक दुरी कायम गर्ने भनेर भाडा धेरै लिने तर अरू कुनै मापदण्ड पूरा नगरेर भाडा मात्र धेरै लिने कुरा सही हुन सक्दैन । त्यसैले यो विषयमा सरकार, यातायात व्यवसायी र सम्बन्धित निकायको गम्भीर ध्यानाकर्षण होस र सम्पूर्ण मापदण्ड पूरा गरी सङ्क्रमणको सम्भावनालाई रोक्ने गरी यात्रुलाई यात्रा गराउन हाम्रो पार्टी विशेष रूपमा जोड दिन चाहन्छ ।”
