मधु क्षेत्री
जता हेर्यो त्यतै कोलाहल
जता छिर्यो त्यतै कोलाहल
कोलाहल ! कोलाहल ! ! कोलाहल ! ! !
सरकारमा हेर्यो कोलाहलै कोलाहल
यस्तै गुज्रिरहेको छ देशको हाल
कोरोनाको कोलाहल
सलहको कोलाहल
सरकार अपदस्त हुन्छ कि भन्ने कोलाहल
सङ्कटकाल लाग्छ कि भन्ने कोलाहल
सलहले बाली नष्ट पार्छ कि भन्ने कोलाहल
गाउँका गाउँ पहिरो जान्छ कि भन्ने कोलाहल
कतै राष्ट्रियता धरापमा पर्छ कि भन्ने कोलाहल
चेलीबेटी बलात्कृत हुन्छन् कि भन्ने कोलाहल
हत्या र हिंसा बढ्छ कि भन्ने कोलाहल
कतै अनिकाल लाग्छ कि भन्ने कोलाहल
यस्तै कोलहालै कोलाहलको बिचबाट
फेरि पनि स्वाभिमानी देशभक्तहरू
राष्ट्रिय अखण्डताको निम्ति
सङ्घर्ष गरिरहेकै छन्
सिरमा कफन बाँधेर
सडक तताइरहेकै छन्
कोरोना महामारीबाट गुज्रिरहेका हामी
एमसिसीका विरुद्ध लडिरहेका हामी
राष्ट्रिय सर्वभौम जोगाउन
भारतीय साम्राज्यवादाद्वारा अत्तिक्रमित नेपाली भूभाग
कालापानी, लिपुलेक र लिम्पियाधुरा
फिर्ता गर भन्दै सडक तताउँदै छन्
एमसिसी खारेजीको आन्दोलन गर्दै छन्
त्यसैले राष्ट्रिय स्वाभिमानको लडाइँ निस्तेज पार्न
साम्राज्यवादीहरू चलखेल गर्दै छन्
सरकार अपदस्त गराउने षड्यन्त्र रच्दै छन्
‘फुट हाल राज गर’ को नीति अपनाउँदै छन्
फेरि पनि नेताहरू आपसमा लसडरहेका छन्
अपाङ्ग भएको छ बहुमतको सरकार
असहाय भएको छ सत्तासिन वामपन्थी शक्ति
देशलाई अनिर्णयको बन्दी बनाएर
जुँगाको लडाइँमा रमिरहेका छन्
सामाजिक न्यायको कुनै आभाष पाइँदैन
जताततै कोलाहलै कोलाहल मच्चिएको छ
विखण्डकारीहरू !
राष्ट्रघाती स्वरहरू ओकल्दै छन्
अमेरिकी साम्राज्यवादले
एमसिसीको जालो फालेको छ
भारतीय साम्राज्यवादले
नाकाबन्दीका ध्वाँस देखाउँदै छ
यस्तो सङ्गिन घडीमा
विखण्डनकारीहरूका विरुद्ध
अमेरिकी साम्राज्यवादका विरुद्ध
कोरोना महामारीको सामना गर्न
प्राकृतिक विपत्तिको सामना गर्न
दुईतिहाइको तर निरीह सरकार
अपाङ्ग भएको छ, असहाय भएको छ
त्यसैले, स्वाभिमानी देशभक्तहरू
जनतातै निर्णायक शक्ति भएको हुँदा
जागौँ, उठौँ, खबरदारी गरौँ
राष्ट्रिय अखण्डताको रक्षा गरौँ
राष्ट्रिय स्वाभिमानको रक्षा गरौँ
इङ्कलाबको आवाज बुलन्द गरौ !
