दुर्गा पौडेल, उपाध्यक्ष तथा प्रवक्ता, राष्ट्रिय जनमोर्चा

१
श्रम संस्कृति पार्टीका अध्यक्ष हर्क साम्पाङले कथित स्वतन्त्र पार्टीका वरिष्ठ नेता बालेन साह र त्यसका सभापति रवी लामिछानेलाई बारम्बार एमसीसीको विरोध गर्न चुनौति दिने गरेका छन् । तर ती दुवै जनाले त्यसो गर्न सकेका छैनन् र गर्न पनि सक्दैनन् । त्यसबाट उनीहरूको कथित स्वतन्त्र पार्टीको निर्माण अमेरिकी साम्राज्यवादको सेवाको लागि भएको र उनीहरू दुवै जनाको राजनीतिक उद्देश्य पनि अमेरिकी साम्राज्यवादको नेपालप्रतिको साम्राज्यवादी नीतिको सेवा गर्नु नै भएको कुरामा कुनै शङ्का रहन्न ।

अमेरिकाको अहिलेको नेपालप्रतिको रणनीति एमसीसीद्वारा नेपालको तटस्थ परराष्ट्र नीतिलाई समाप्त गरेर हाम्रो देशलाई अमेरिकाको सुरक्षा नीतिअन्तर्गत ल्याउन र दलाई लामालाई पुनर्स्थापना गर्न तिब्बतमाथि आक्रमण गर्न नेपाललाई युद्ध भूमि बनाउनु हो । त्यो उद्देश्य पूरा गर्न अमेरिकाले नेपालमा आफ्नो कठपुतली सरकार कायम गर्न चाहन्छ । त्यसैका लागि त्यसले बालेन र रवी जस्ता पात्रहरूलाई अगाडि सारेको छ । उनीहरूको चुनाव चिन्ह घण्टी हो ।

अमेरिकाले अन्य कतिपय पार्टीका नेताहरूलाई पनि प्रधानमन्त्रीको उम्मेदवारका रूपमा अगाडि सारेको छ । त्यसका पछाडिको अमेरिकाको उद्देश्य हो सत्ता र विपक्ष दुवैको नेतृत्व आफ्नो हातमा लिनु र त्यसरी सम्पूर्ण संसदमाथि आफ्नो प्रभुत्व कायम गर्नु । त्यही योजनाअन्तर्गत नै अमेरिकाले नेपालको संसदको विघटन गराएर नयाँ चुनावको घोषणा पनि गराएको हो । अहिले चुनावको माध्यमद्वारा अमेरिकाले संसदमा पूरै नै आफ्ना मान्छेहरूलाई विजयी बनाउन चाहन्छ ।

अहिले देशमा एक प्रकारले घण्टीको जुन लहर जस्तो देखापरेको छ, त्यसका पछाडि पनि अमेरिकाको पूरै संसदमाथि कब्जा जमाउने र त्यसरी नेपालमा आफ्नो कठपुतली सरकार बनाएर नेपालमाथि पूरै प्रभुत्व कायम गर्ने उद्देश्यले नै काम गरेको छ । त्यसका लागि त्यसले ठुलो पैमानामा डलर खर्च गर्नुका साथै त्यसको मातहतमा भएका सामाजिक सञ्जाललाई पनि धेरै नै प्रयोग गरेको छ । त्यो अवस्थामा यो कुरामा कुनै शङ्का रहन्न कि घण्टीमा भोट हाल्नुको अर्थ नेपालमा अमेरिकाको कठपुतली सरकार बनाउनु र नेपाललाई युद्ध भूमि बनाउन अमेरिकी साम्राज्यवादको सेवा गर्नु नै हुने छ ।

२
सङ्घीयता नेपाली जनताको माग वा आन्दोलनका आधारमा कायम भएको व्यवस्था नभएर विदेशी शक्तिहरूको दबाबमा कायम भएको व्यवस्था हो । त्यो कुरा यसबाट पनि प्रस्ट हुन्छ कि प्रजापरिषददेखि लिएर पछि बनेका वामपन्थी वा प्रजातान्त्रिक पार्टीहरूमध्ये कसैले पनि कहिल्यै आफ्ना नीतिहरूमा सङ्घीयताको उल्लेख गरेका थिएनन् र त्यसका लागि आन्दोलन पनि गरेका थिएनन् । पछि विदेशी दबाबमा आएर नै नेपालका प्रमुख राजनीतिक पार्टीहरूले सङ्घीयतालाई अपनाएका हुन् । प्रस्ट छ कि त्यसबाट राष्ट्रिय विखण्डन तथा क्षेत्रीय र जातीय विखण्डनको स्थिति उत्पन्न हुने छ र त्यो हुँदै पनि गइरहेको छ । त्यसैले सङ्घीयतालाई खारेज गर्नु अहिले राष्ट्रिय आवश्यकता भएको छ ।

सङ्घीयतामा अहिले अत्यन्त ठुलो धनराशि अनावश्यक रूपले खर्च भइरहेको छ । त्यसको प्रादेशिक संरचनामा पनि देशको ठुलो धनराशि खर्च भइरहेको छ । सङ्घीयता र त्यसको प्रादेशिक संरचनालाई खारेज गरेपछि त्यसका लागि जुन अनावश्यक धनराशि खर्च भइरहेको छ, त्यसमा बचत भएर स्वास्थ्य र उच्चस्तरसम्मको शिक्षा निःशुल्क हुन सक्ने छ र सङ्घीयतालाई खारेज गरेर ती दुवैलाई निःशुल्क गराउनुपर्दछ । त्यसपछि स्थानीय निकायहरूको अधिकार र बजेटमा समेत वृद्धि हुन सक्नेछ र त्यसरी देशको विकासमा धेरै मद्दत पुग्ने छ । हाम्रो जोड यो कुरामा छ कि सङ्घीयतालाई खारेज गरेर त्यसका ठाउँमा पुरानो प्रकारको केन्द्रीकृत र नोकरशाही प्रकारको एकात्मक प्रणाली होइन, प्रजातान्त्रिक विकेन्द्रियता र स्थानीय स्वायत्त शासनमाथि आधारित एकात्मक प्रणालीको स्थापना गर्नुपर्दछ ।

३
भ्रष्टाचार अहिलेको देशको गम्भीर समस्या बनेको छ र त्यसले गर्दा देशका कुशासन कायम भएको छ । त्यो अवस्थामा भ्रष्टाचार र कुशासनलाई समाप्त गर्नु अहिलेको राष्ट्रिय आवश्यकता भएको छ । त्यस पछि नै देशको दिगो विकास हुन सक्नेछ । कतिपय नयाँ बनेका राजनीतिक समूहहरू वा नयाँ देखापरेका राजनीतिक नेताहरूले पुराना पार्टी वा नेताहरूलाई विस्थापित गरेपछि नै भ्रष्टाचारको अन्त्य हुने र देशको विकास हुने भ्रम जनतामा फैलाउने गरेका छन् । तर प्रश्न को पुरानो हो र को नयाँ हो भन्ने होइन, प्रश्न कसको नीति, कार्यक्रम वा राजनीतिक पृष्ठभूमि सही छ वा छैन भन्ने कुराको हो । जुन राजनीतिक समूह वा नेताहरू अगाडि आएका छन्, प्रथम, उनीहरूमध्ये नयाँ छदै उनीहरू आर्थिक अनियमितता वा भ्रष्टाचारका कैयौँ मुद्दामा बदनाम भएका छन् भने, द्वितीय, नयाँ आएका नेताहरू खालि उनीहरूको चर्का र आकर्षण भाषण वा पुराना पार्टी र नेताहरूको आलोचना गरेको आधारमा होइन, लामो व्यवहारको कसौटीमा खारिएपछि नै उनीहरूमध्येको कति सही वा गलत छन् ? त्यो कुरा थाहा हुने छ । त्यस प्रकारको परीक्षा बिना कसैमाथि विश्वास गर्दा देशलाई धोखा नै हुने छ ।

४
राष्ट्रिय जनमोर्चा नेपालको एउटा पुरानो राजनीतिक पार्टी हुनुका साथै त्यसका अध्यक्ष कामरेड चित्रबहादुर केसी पनि निष्कलङ्क र इमानदार छवि भएको नेता हुनुहुन्छ र उहाँको लामो राजनीतिक जीवनद्वारा त्यो कुरा प्रमाणित भइसकेको छ । लेखा समितिको सभापति वा सरकारको उपप्रधानमन्त्री हुँदा पनि उहाँले कुनै भ्रष्टाचार नगरेको कुरा आम जनतामा सर्वविदित छ । त्यही प्रकारले गत तीन दशकदेखि त्यसका कैयौँ नेता वा कार्यकर्ताहरू संसदमा निर्वाचित हुने गरेका छन् । विभिन्न राजनीतिक पार्टीहरूका सांसदहरूले आर्थिक अनियमितता वा भ्रष्टाचार गरेका कैयौँ कुरा आम जनतालाई थाहा हुने गरेको छ । तर राष्ट्रिय जनमोर्चाका अध्यक्ष कामरेड चित्रबहादुर केसीले मात्र होइन, त्यसका कुनै पनि सांसदले कुनै पनि प्रकारको आर्थिक अनियमितता वा भ्रष्टाचार नगरेको कुरा आम जनतालाई थाहा छ । त्यही प्रकारले त्यसका विभिन्न स्थानीय निकायहरूमा निर्वाचित जनप्रतिनिधिहरूले पनि कहिल्यै कुनै प्रकारको भ्रष्टाचार गर्ने गरेका छैनन् । त्यस प्रकारको पृष्ठभूमिमा देशमा कायम भएको भ्रष्टाचार र कुशासनको सही विकल्प राष्ट्रिय जनमोर्चाजस्तो पार्टी नै हुन सक्ने कुरा दिनको उज्यालो झैँ छलङ्ग छ । त्यसैले, त्यसका उम्मेदवारहरू ठुलो सङ्ख्यामा निर्वाचित भएर संसदमा पुगेपछि नै भ्रष्टाचार र कुशासनको अन्त्य र सुशासनको स्थापना तथा देशको विकासमा महत्त्वपूर्ण बल पुग्ने कुरा अवश्यम्भावी छ । त्यसैले हामीले प्रत्यक्ष वा समानुपातिकतर्फका राजमोका उम्मेदवारहरूलाई भारी मत दिएर विजयी बनाउन जनतासित सादर अनुरोध गर्दछौँ ।

५
आज देशमा नेपाली जनताले करिब एक शताब्दीसम्म महान् सङ्घर्ष तथा त्याग र बलिदान गरेर प्राप्त गरेका गणतन्त्र, धर्मनिरपेक्षता र बहुदलीय व्यवस्थालाई समाप्त गरेर राजतन्त्र र निरङ्कुश शासनको पुनर्स्थापना लागि प्रतिगामी खतरा बढ्दै गइरहेको छ । त्यसका साथै साम्राज्यवादी हस्तक्षेप र अतिक्रमणका कारणले देशको राष्ट्रियता र सार्वभौमिकतामा पनि गम्भीर खतरा उत्पन्न भएको छ । त्यो अवस्थामा गणतन्त्र, धर्मनिरपेक्षता र बहुदलीय व्यवस्थाको रक्षाका लागि प्रतिगमनका विरुद्ध तथा देशको राष्ट्रियता र सार्वभौमिकताको सुरक्षाका लागि साम्राज्यवादी शक्तिहरूका विरुद्ध दृढतापूर्वक र सम्झौताहीन प्रकारले सङ्घर्ष गर्नु अहिलेको राष्ट्रिय आवश्यकता भएको छ । त्यसका लागि पनि राष्ट्रिय जनमोर्चाले सम्पूर्ण जनताको ध्यान आकर्षित गर्न चाहन्छ ।

अन्त्यमा, यसबारे पनि हामीहरू स्पष्ट हुनुपर्ने आवश्यकता छ कि विद्यमान गणतन्त्र र बहुदलीय व्यवस्थाका ठाउँमा उच्च प्रकारको लोकतन्त्र वा नयाँ जनवादी व्यवस्थाको स्थापना पछि नै जनताका आधारभूत समस्याहरूको समाधान हुने छ । त्यसका लागि पनि हामीले सम्पूर्ण जनताको ध्यान आकर्षित गर्न चाहन्छौँ ।