ऋतु केसी ##

भोट हाल्न जादा सम्झनू है
यो कुनै मेला हेर्न जाने टिकट होइन भनेर
एकपटक होइन, पटकपटक सोच्नू है
राष्ट्रघाती र भ्रष्टाचारीलाई मेरो भोट होइन भनेर

सोच्नू है, एउटा कागज मात्र होइन मेरो भोट
यो त भविष्यको सुन्दर नक्सा हो भनेर
एउटा फगत चिह्नमा मात्र होइन मेरो भोट
यो त देशको भविष्य कोर्ने शक्ति पो हो भनेर

न हिजो न भोलिको खाका नभएकाहरू
सिद्धान्तविहीन आश्वासन झोलाभरि लिएर
कुदिरहेछन् मानौँ देश भोलि होइन आजै बन्नेछ जसरी
जादुको कुनै छडी उनीहरूकै हातमा छ जस्तै गरी

बोलिका मिठा ललिपप
एकछिनलाई खुबै मिठा लाग्नेछन
भिडका लावालस्कर
एकछिनलाई खुबै रसिला लाग्नेछन्
तर क्षणिक मिठास भविष्यको विष बन्नेछ
त्यसैले आँखा मात्र होइन, अन्तर्दृष्टि खोलौँ
हात होइन, विवेक उठाऔँ
राष्ट्रघातीलाई होइन, राष्ट्रवादीलाई रोजौँ

तपाईंको एक अमूल्य भोट देश बेच्नेलाई होइन
यो देश बचाउन वर्षौंदेखि लडिरहेकालाई रोजौँ