दुबई । अमेरिका र इजरायलले इरानमाथि आक्रमण गरेपछि उसले प्रत्याक्रमणस्वरूप संयुक्त अरब इमिरेट्समा रहेको अमेरिकी बेसक्याम्पमा प्रत्याक्रमण गरिरहेको छ ।
युएईको रक्षामन्त्रालयले भने इरानबाट प्रहार गरिएका एक सय ३७ ब्यालेस्टिक मिसाइल र दुई सय नौओटा ड्रोन आकाशमै नष्ट (इन्टरसेप्ट) गरेको बताएको छ ।
युएईको वायुरक्षा प्रणालीले धेरैजसो आक्रमण विफल पारे पनि आकाशमा नष्ट गरिएका मिसाइल र ड्रोनका टुक्रा (भग्नावशेष) खस्दा एक जनाको मृत्यु भएको छ भने केही स्थानमा आगलागी र भौतिक क्षति भएको बताइएको छ ।
आबुधाबी एयरपोर्टस्का अनुसार जायद अन्तर्राष्ट्रिय विमानस्थललाई लक्षित गरी आएको ड्रोन खसाल्दा त्यसको टुक्रा लागेर एक पाकिस्तानी नागरिकको मृत्यु भएको छ भने अन्य सात जना घाइते भएका छन् ।
त्यस्तै, दुबई अन्तर्राष्ट्रिय विमानस्थलमा भएको घटनामा चार जना घाइते भएका छन् । उनीहरूको तत्काल उपचार गरिएको छ। ड्रोनको टुक्रा खस्दा विश्वप्रसिद्ध बुर्ज अल अरब होटलको बाहिरी भागमा र पामेजुमेराहको एक भवनमा सामान्य आगलागी भएको थियो, जसलाई नियन्त्रणमा लिइएको छ ।
हवाई उडान ठप्प
सुरक्षा जोखिम बढेपछि युएईले आफ्नो हवाई क्षेत्र आंशिक रूपमा बन्द गरेको छ ।
इमिरेट्स एयरलाइन्सले आइतबार दिउँसो ३ बजेसम्मका लागि दुबईबाट हुने र आउने सबै उडान स्थगित गरेको छ भने इतिहाद एयरवेजले आइतबार दिउँसो २ बजेसम्मका लागि अबुधाबीबाट हुने सबै उडान रद्द गरेको छ ।
यस्तै एयर अरेबियाले आइतबार दिउँसोसम्मका लागि सारजाहबाट हुने उडान स्थगित गर्दा सारजाह र दुबई एयरपोर्टमा हालका लागि सबै उडान बन्द गरिएको छ ।
अधिकारीले यात्रुलाई विमानस्थल जानुअघि आफ्नो एयरलाइन्ससँग सम्पर्क गर्न र उडानको स्थिति बुझ्न आग्रह गरेका छन् । उडान रद्द भएर अलपत्र परेका करिब २० हजार यात्रुलाई युएई सरकारले होटल र खानाको व्यवस्था गरेको छ ।
सुरक्षा सतर्कता अपनाउँदै युएईको शिक्षा मन्त्रालयले मार्च २ देखि मार्च ४ सम्म (३ दिन) देशभरका सबै सरकारी तथा निजी विद्यालय र विश्वविद्यालयमा भौतिक उपस्थिति बन्द गरी अनलाइन माध्यमबाट पढाइ सञ्चालन गर्ने निर्णय गरेको छ ।
हल्ला नफैलाउन अनुरोध
युएईको पब्लिक प्रोसिक्युसनले सामाजिक सञ्जालमा घटनाबारे गलत हल्ला, फोटो वा भिडियो सेयर नगर्न कडा चेतावनी दिएको छ ।
आधिकारिक स्रोतबाहेकका जानकारी सेयर गर्ने वा रिपोस्ट गर्ने व्यक्तिलाई कानुनी कारबाही हुने बताइएको छ ।
त्यसका साथै बजारमा खाद्यान्नलगायत अत्यावश्यक वस्तुको पर्याप्त मौज्दात रहेकाले आत्तिएर सामान थुपार्नुनपर्ने सरकारले स्पष्ट पारेको छ
