काठमाडौँ । धादिङमा मध्यराति भएको बस दुर्घटनामा छ महिला ११ पुरुषसहित १७ जनाको मृत्यु भएको छ भने दुर्घटनामा २७ जना घाइते भएको समाचार छ ।
राति करिब साढे १ बजे धादिङ, बेनिघाट रोराङ गाउँपालिका–५ भैंसिगौडास्थित पृथ्वी लोकमार्गमा सो दुर्घटना भएको हो ।
पोखराबाट काठमाडौँतर्फ आउँदै गरेको ग१ ख १४२१ नम्बर यात्रुबाहक बस त्रिशूली नदीको किनारमा खसी दुर्घटना भएको थियो ।
उक्त स्थानमा उद्धारका लागि सशस्त्र प्रहरी बल नेपालको बिपत् व्यवस्थापन तालिम शिक्षालय कुरिनटारबाट गोताखोरसहितको टोली खटिएको तथा नेपाल प्रहरी र सेनाको टोली पनि उद्धारमा खटिएको प्रशासनले जानकारी दिएको छ ।
मृत्यु भएका १७ जनाको शव घटनास्थलमा नै छ । राति भएकाले उद्धारमा कठिनाइ भएको प्रहरीले बताएका छन् ।
त्यस्तै घटनास्थलबाट ८ महिला, १८ पुरुष र एक बालिका गरी २७ जनालाई उद्धार गरी विभिन्न अस्पताल पठाइएको छ । घाइते तथा मृतकको सनाखत हुन बाँकी छ । दुर्घटनाको कारण खुलेको छैन ।
