राष्ट्रिय जनमोर्चाका तर्फबाट प्रतिनिधिसभा सदस्यका उम्मेदवार तिलक जिसी प्युठानको माटोमा हुर्किएका र वर्गसंघर्ष, जनसंघर्ष र कम्युनिष्ट आन्दोलनसँग गाँसिएर विकसित भएका अनुभवी बामपन्थी नेता हुनुहुन्छ । उनको राजनीतिक जीवन कुनै आकस्मिक अवसर वा सत्ता–केन्द्रित सौदाबाजीको परिणाम होइन, निरन्तर संघर्ष, त्याग र सिद्धान्तनिष्ठ यात्राको प्रतिफल हो ।

वि.सं. २०३६ सालतिर १४–१५ वर्षको उमेरमै विद्यार्थी आन्दोलनबाट राजनीतिमा प्रवेश गर्नुभएका तिलक जिसी त्यसयता आजसम्म कम्युनिष्ट आन्दोलनको नीति, सिद्धान्त र वर्गीय दृष्टिकोणमा अडिक रहँदै आउनुभएको पक्का तथ्य हो। उहाँले राजनीतिलाई व्यक्तिगत लाभ, पद वा पहुँचको साधनका रूपमा होइन, श्रमिक, किसान, उत्पीडित वर्ग र पिछडिएको समुदायको मुक्ति र अधिकारको संघर्षका रूपमा बुझ्नुभएको छ ।

प्युठानका दुर्गम गाउँ–बस्ती, पहाड, खोला–नाला र खेत–खलियान उहाँका राजनीतिक विद्यालय हुन् । उहाँ सधैँ जनताको बीचमै रहनुभयो, जनताको पीडा सुन्नुभयो र समाधानका लागि संघर्ष गर्नुभयो । चुनावका बेला मात्र जनतासँग देखिने नेता होइन, निरन्तर जनताकै जीवनसँग जोडिएर राजनीति गर्ने नेता हुनुहुन्छ तिलक जिसी । यही कारण उहाँलाई प्युठान भूमिको साँचो पुत्र र जनताबाटै खारिएको नेता मानिन्छ ।

कम्युनिष्ट आन्दोलनलाई नारामा सीमित गर्ने प्रवृत्तिको उहाँ निरन्तर आलोचक रहनुभएको छ । उहाँका लागि कम्युनिष्ट राजनीति भनेको व्यवहारमा देखिनुपर्ने इमानदारी, पारदर्शिता र वर्गीय पक्षधरता हो । यही वैचारिक स्पष्टता र सिद्धान्तनिष्ठताका कारण उहाँ बामपन्थी आन्दोलनका अब्बल नेताका रूपमा स्थापित हुनुभएको छ ।

तिलक जिसी जनताबाट प्रत्यक्ष रूपमा परीक्षण भइसकेका नेता हुनुहुन्छ । उहाँ गाउँ विकास समितिको अध्यक्ष हुँदै झिमरुक गाउँपालिकाको अध्यक्षमा निर्वाचित हुनुभयो । यी विजयहरू केवल चुनावी परिणाम मात्र थिएनन्, जनताले कम्युनिष्ट मूल्य, इमानदार नेतृत्व र जनमुखी शासनलाई दिएको स्पष्ट समर्थन थिए ।

झिमरुक गाउँपालिकाको अध्यक्षको रूपमा उहाँले देखाउनुभएको नेतृत्व आज पनि स्थानीय शासनको उदाहरणका रूपमा लिइन्छ। सीमित स्रोत–साधनका बाबजुद उहाँले शिक्षा, स्वास्थ्य, खानेपानी, कृषि, सडक र पूर्वाधार विकासमा उल्लेखनीय प्रगति गर्नुभयो। योजना छनोटदेखि बजेट कार्यान्वयनसम्म जनसहभागिता, पारदर्शिता र उत्तरदायित्व सुनिश्चित गरियो ।

भ्रष्टाचारविरुद्ध शून्य सहनशीलताको नीति उहाँको कार्यकालको मेरुदण्ड रह्यो । सार्वजनिक सम्पत्तिलाई निजी स्वार्थका लागि दुरुपयोग गर्ने प्रवृत्तिलाई उहाँले कडाइका साथ रोक्नुभयो। ठेक्का, योजना र उपभोक्ता समितिमा हुने अनियमिततामाथि नियन्त्रण गर्दै जनताको एक–एक रुपैयाँ जनताकै हितमा खर्च गरियो। यही कारण झिमरुक गाउँपालिका लुम्बिनी प्रदेशकै उत्कृष्ट स्थानीय तहका रूपमा स्थापित भयो र लुम्बिनीमै पहिलो बन्न सफल भयो ।

यो सफलता संयोग थिएन, यो कम्युनिष्ट सुशासनको व्यवहारिक अभ्यास थियो । व्यक्तिगत लाभभन्दा सामूहिक हितलाई प्राथमिकता दिने, शक्ति र पदलाई सेवाको माध्यम बनाउने र वर्गीय पक्षधरतालाई व्यवहारमा उतार्ने नेतृत्वकै कारण झिमरुकले उदाहरणीय पहिचान बनायो ।

आज देशमा कम्युनिष्ट आन्दोलनको नाममा वैचारिक विचलन, अवसरवाद र सत्ता–केन्द्रित राजनीतिले चुनौती पैदा गरिरहेको सन्दर्भमा तिलक जिसी जस्ता सिद्धान्तनिष्ठ नेताको आवश्यकता झनै बढेको छ। उहाँ सधैँ संसदीय राजनीति जनसंघर्षको सहायक माध्यम हुनुपर्छ भन्ने मान्यतामा अडिग रहनुभएको छ । संसदलाई सौदाबाजीको थलो होइन, जनताको आवाज बुलन्द गर्ने मञ्च बनाइनुपर्छ भन्ने उहाँको स्पष्ट दृष्टिकोण छ ।

प्रतिनिधिसभा सदस्यका उम्मेदवारका रूपमा उहाँ संसदमा पुग्दा भ्रष्टाचारविरुद्ध कडा हस्तक्षेप, जनताको अधिकारका पक्षमा दृढ अडान र कम्युनिष्ट आन्दोलनको नीति–सिद्धान्तअनुसारको स्पष्ट भूमिका निर्वाह हुने अपेक्षा गरिएको छ । श्रमिक, किसान, युवाहरू, महिला र उत्पीडित समुदायका सवाललाई राष्ट्रिय एजेन्डाका रूपमा स्थापित गर्न उहाँ प्रतिबद्ध हुनुहुन्छ ।

प्युठानको माटोमा हुर्किएका, आन्दोलनबाट खारिएका, जनताबाट जितेर काम गरेर देखाएका र आज पनि कम्युनिष्ट मूल्यमा अडिग तिलक जिसी बामपन्थी आन्दोलनका अब्बल र भरोसायोग्य नेता हुनुहुन्छ । उहाँको उम्मेदवारी केवल एक व्यक्तिको राजनीतिक यात्रा होइन, अवसरवादी राजनीतिविरुद्धको स्पष्ट चुनौती र सिद्धान्तनिष्ठ कम्युनिष्ट राजनीतिका पक्षमा मजबुत विकल्प हो ।