खलङ्गा । प्युठानको रकगार्डेनमा अखिल नेपाल युवक सङ्घको विशेष अभियान सम्पन्न भएको छ ।
झिमरुक गाउँपालिकाको वडा नं. ५ ढाडाबजारस्थित रकगार्डेन पार्कमा २०८२ पुस २६ गते शनिबार सो कार्यक्रम सम्पन्न भएको हो ।
युवक सङ्घका केन्द्रीय अध्यक्ष गणेश अधिकारीको प्रमुख अतिथि रहेको उक्त कार्यक्रममा युवक सङ्घकी जिल्ला समितिका सदस्य सुशील जिसी, राष्ट्रिय जनमोर्चा झिमरुक गाउँपालिका समितिका विनोदविक्रम जिसी र राजेश बस्नेत, युवक सङ्घका नेता प्रकाश जिसी, अखिल नेपाल महिला सङ्घ झिमरुककी बसन्ता खड्का र जातीय समता समाजका नेता केशर परियारको पनि आतिथ्य रहेको थियो ।
वक्ताहरूले वर्तमान राजनीतिक अवस्था, युवाका समस्या, राजनीतिमा युवा आन्दोलनको महत्त्व र प्रशिक्षण तथा अभियानको बारेमा प्रष्ट पार्नुभएको थियो ।
राजमो झिमरुकका सल्लाहकार रामबहादुर महतराको सञ्चालनमा अघि बढेको उक्त कार्यक्रममा युवक सङ्घको सदस्यता वितरण, अन्तरक्रियालगायतका गतिविधि सम्पन्न गरिएको थियो ।
त्यस्तै झिमरुक ६ नम्बर वडाको धगे टोलबस्तीमा युवक सङ्घले अभियान सञ्चालन गरेको छ ।
सो कार्यक्रममा युवक सङ्घका कोषाध्यक्ष कमल पौडेल, नेकपा (मसाल) ५ नम्बर ब्युरो प्रवक्ता तिलक जिसी, राजमो प्युठानका जिल्ला कोषाध्यक्ष टिका जिसी र राजमो नेता हेमराज भट्टराईले प्रशिक्षण दिनुभएको थियो ।
कार्यक्रमको सञ्चालन दिलिप विकले गर्नुभएको थियो ।
