काठमाडौँ । प्रगतिशील लेखक सङ्घले भारतीय क्रान्तिकारी तेलुगुभाषी कवि, समालोचक एवम् राजनीतिकर्मी बरबर रावको जीवनरक्षा गर्न माग गरेको छ । अध्यक्ष प्रा.डा. जीवेन्द्र देव गिरी तथा महासचिव समीर सिंहको हस्ताक्षरमा २०७७ असार २९ गते प्रेसवक्तव्य जारी गर्दै यस्तो माग गरिएको हो ।
भारतको मोदी सरकारले बरबर रावसहित अरू तीन जना बुद्धिजीवीलाई हिरासतमा राखेकोमा अहिले बरबर रावको स्थिति गम्भीर रहेको बताउँदै प्रलेसले उनको जीवनरक्षा गर्न माग गरेको छ । वक्तव्यको पूर्ण पाठ यस्तो छ :
“भारतका क्रान्तिकारी तेलुगुभाषी कवि, समाचोचक, राजनीतिकर्मी एवम् बुद्धिजीवी बरबर रावसहित सुधा भारद्वाज, वरनान गोन्जाल्विज, गौतम नवलखालाई फासीवादी मोदी सरकारले हिरासतमा राखेको छ ।
माक्र्सवादी चिन्तक एवम् कवि बरबर राव सन् १९४० मा तत्कालीन आन्ध्रप्रदेशको वारङ्गलमा जन्मिनुभएको थियो । उहाँ यति बेला महाराष्ट्रको तलोजा जेलमा गम्भीर बिरामी अवस्थामा हुनुहुन्छ । विश्वभरबाट ‘भारतीय क्रान्तिकारी कवि बरबर रावको जीवन रक्षा गर’ भन्ने आवाज उठिरहेको सन्दर्भमा प्रगतिशील लेखक सङ्घ पनि त्यो न्यायपूर्ण आवाजप्रति ऐक्यबद्धता प्रकट गर्दछ ।
महाराष्ट्रको भीमा–कोरेगाउँमा आयोजना गरिएको कार्यक्रमले हिंसात्मक रूप लिएपछि त्यस बेला दलित युवाहरूको हत्या एवम् अल्पसङ्ख्यकका घर र पसलसमेत लुटिएको थियो । भीमा–कोरेगाउँको घटनामा भारतीय सरकारले माओवादीको घुसपैठको आरोप लगाउँदै लेखक, पत्रकार, मानवअधिकारवादी, वकिलसमेत आधा दर्जन सामाजिक कार्यकर्तालाई माओवादीसम्बद्ध ‘सहरी नक्सल’ भनेर प्रचार गर्दै आइरहेको छ । भारतीय फासिवादी मोदी सरकार ‘सहरी नक्सल’ को नाममा आज पनि देशव्यापी छापा मार्ने तथा धरपकड गर्ने काम गरिरहेको छ । मोदी सरकारद्वारा लेखक तथा बुद्धिजीवी बरबर रावलगायतका बुद्धिजीवी, सामाजिक अभियानकर्मीको गिरफ्तारी र अदालतको आदेशपश्चात् घरमै नजरबन्द गरिएको थियो । त्यसपछि उहाँहरूलाई जेलमा लगिएको थियो । मोदी फासिवादले भारतका बहुचर्चित सामाजिक अभियन्ता एवम् बुद्धिजीवीलाई करिब २२ महिनाअघि हिरासतमा लिएको थियो ।
कवि बरबर रावको स्वास्थ्य अवस्था गम्भीर बन्दै गएपछि उहाँको परिवारले १२ जुलाई २०२० मा एक प्रेसविज्ञप्ती जारी गर्दै, स्वास्थ्यस्थिति बिग्रँदै गइरहेको बताउँदै उहाँको जीवनरक्षाको माग गरेको छ । प्रलेस पनि उहाँको परिवारसहित विश्वभरिबाट उठिरहेको न्यायपूर्ण आवाजप्रति ऐक्यबद्धता जाहेर गर्दै उहाँलगायत सम्पूर्ण प्रगतिशील कवि तथा लेखकहरूको यथाशीघ्र रिहाइको माग गर्दछ ।”
