आनन्द शर्मा ##
आज देशको परिस्थिति अत्यन्तै अन्योलपूर्ण अवस्थामा रहेको छ । गत भदौ २३ र २४ गतेको घटनापछि देश कतातिर जान्छ भन्ने अनिश्चितको स्थिति पैदा भएको छ ।
लामो समयदेखि हाम्रो देशमा भ्रष्टाचार र कुशासन व्याप्त थियो । त्यसकारण आम जनतामा व्यापक रूपमा असन्तुष्टि, आक्रोश र विरोध थियो । त्यस्तो परिस्थितिमा जनताको आवाज वा आन्दोलन कुनै पनि प्रकारले विस्फोट हुने परिस्थिति बनेकै अवस्था थियो ।
गणतन्त्र आइसकेपछि पनि पालैपालो सत्तामा जाने राजनीतिक दल, नेता, उहाँहरूको भ्रष्ट र अकर्मण्यताको कारणले जनतामा व्यापक निराशाको परिस्थिति बन्न गयो । यस्तो परिस्थितिमा जनताको त्यो आक्रोश एउटा जेनजी आन्दोलनको रूपमा प्रस्तुत हुन गयो । जेनजी आन्दोलनले देशमा एउटा नयाँ परिस्थिति सिर्जना हुन गएको छ ।
जेनजी आन्दोलन के हो ? यो कसरी चल्यो ? यो पनि छलफलकै एउटा बहसकै विषय बन्न पुगेको छ ।
हाम्रो पार्टीको एउटा स्पष्ट धारणा रहेको छ, जेनजी प्रदर्शन सत्तामा रहने शक्तिको भ्रष्ट र अकर्मण्यता विरुद्धको आक्रोश हो तर जनताको त्यो आक्रोशलाई देशभित्रका प्रतिगामी शक्ति र विभिन्न साम्राज्यवादी शक्तिले आफ्नो हितको पक्षमा उपयोग गर्न कोसिस गरे । त्यसमा व्यापक घुसपैठ पनि गराइयो । राष्ट्रमा अभूतपूर्व रूपमा व्यापक तोडफोड भयो । ठुलो धनजनको क्षति भयो ।
भदौ २३ गते सरकारले निहत्था विद्यार्थीमाथि अनावश्यक बलप्रयोग गर्यो । त्यसले गर्दा ठुलो एउटा मानवीय क्षति पनि हुन पुग्यो । भदौ २४ गते राष्ट्रका धरोहरलाई समाप्त पार्ने, जलाउने काम गरियो । यो इतिहासमा सबैभन्दा भयानक तोडफोड र आगजनी, राष्ट्रिय धरोहरको नोक्सान राष्ट्रले बेहोर्नुपर्ने स्थिति बन्यो ।
अब यस्तो परिस्थितिबाट अहिले संसद् विघटन भएको छ । यो सरकार बनेको छ । सरकार संविधानको कुनै एउटा धारा भित्रबाट बनेको छैन । त्यो पनि एउटा असंवैधानिक ढङ्गले विघटन गरिएको छ ।
फागुन २१ गते चुनावको मिति घोषणा गरिएको छ तर चुनाव हुन्छ कि हुन्न ? कुनै निश्चितता छैन । देश अत्यन्तै अन्योलपूर्ण र एउटा संशयको स्थितिबाट गुज्रिरहेको छ । यस्तो परिस्थितिमा हाम्रो चिन्ताको विषय, नेपाली जनताको चासोको विषय, नेपाली जनताले रगतसँग साटेर प्राप्त गरेका उपलब्धि गणतन्त्र, धर्मनिरपेक्षता, समावेशी समानुपातिकजस्ता उपलब्धि कायम रहन्छन् कि रहँदैनन् ? राष्ट्रको स्वतन्त्रता, सार्वभौमसत्ता र अखण्डता पनि संवेदनशील अवस्थाबाट गुज्रिरहेको छ ।
हामीले देख्यौँ, अमेरिकी साम्राज्यवादले पनि यो आन्दोलनमा व्यापक रूपमा घुसपैठ गरेको र आफ्नो उद्देश्यअनुरूप जनताको आक्रोशलाई आफ्नो योजनामुताबिक परिचालन गर्न प्रयत्न गरेको हामीले महसुस गर्यौँ, चाहे त्यो टिओबीको नाममा होस्, फ्री टिबेट मुभमेन्टको नाममा होस् वा कथित अमेरिकन युथ काउन्सिलको नाममा होस् ।
विगतका यस्ता स्थितिबाट जुन एउटा विदेशी शक्तिको घुसपैठ भयो, त्यसबाट प्राप्त उपलब्धि खोस्नको लागि देश भित्रबाटै भएका प्रतिगामी योजना र षड्यन्त्र भयो । अब यो परिस्थितिलाई राष्ट्रले कसरी चिरेर जाने भन्ने एउटा गम्भीर र सङ्गीन स्थिति राष्ट्रको सामु पैदा भएको छ । निश्चय नै यो कार्यक्रममा यो विषयमा विभिन्न राजनीतिक दलका नेता कमरेड र विभिन्न प्रबुद्ध बुद्धिजीवी साथीहरूले आफ्ना महत्त्वपूर्ण विचार व्यक्त गर्नुभएको छ ।
यसले वर्तमान परिस्थितिलाई बुझ्न र राष्ट्रलाई अगाडि बढाउने विषयमा वैचारिक रूपमा महत्त्वपूर्ण योगदान यो कार्यक्रमले गर्नेछ भन्ने विश्वास व्यक्त गर्दै हाम्रो पार्टीको निमन्त्रणालाई स्वीकार गरेर आउनुभएका विभिन्न पार्टीका नेता कमरेड, विभिन्न बुद्धिजीवी साथी र सबै सहभागी कमरेड साथी सबैलाई हार्दिक स्वागत गर्दै म यहाँबाट बिदा हुन चाहन्छु ।
(२०८२ मङ्सिर ६ गते राष्ट्रिय जनमोर्चा केन्द्रीय कार्यालयद्वारा आयोजित अन्तक्र्रिया कार्यक्रममा दिइएको स्वागत मन्तव्य) ।
