काठमाडौँ । राष्ट्रिय जनमोर्चाका महासचिव मनोज भट्टले चुनावको वातावरण बनाउन प्रधानमन्त्री सुशीला कार्कीसित आग्रह गर्नुभएको छ ।
महासचिव भट्ट २०८२ मङ्सिर ३ गते सिंहदरबारमा आयोजित बैठकमा पार्टीको तर्फबाट धारणा राख्दै हुनुहुन्थ्यो ।
‘समयमै चुनाव गर्ने हो भने सरकारले चुनावको वातावरण बनाउनतिर लाग्नुपर्दछ’ उहाँले भन्नुभयो ।
यता सरकारका पछिल्ला गतिविधिले देशमा चुनावको वातावरण बनिनसकेको उहाँको भनाइ थियो ।
‘सरकारका पछिल्ला गतिविधि हेर्दा चुनावको वातावरण बनेको मान्न सकिन्न’ उहाँले भन्नुभयो– ‘सरकारले चुनावका स्टेकहोल्डर राजनीतिक दलहरूलाई विश्वासमा लिएर चुनावको वातावरण बनाउनतर्फ लाग्नुपर्दछ ।’
महासचिव भट्टले अहिलेको तदर्थ अवस्थामा मुलुक लामो समयसम्म चल्न नसक्ने बताउँदै फागुन २१ गते नै निस्पक्ष र भयरहित वातावरणमा चुनाव सम्पन्न गर्न सरकार लाग्नुपर्ने माग राख्नुभयो ।
सरकारले निस्पक्ष र भयरहित चुनावको वातावरण बनाए आफ्नो दल चुनावमा सहभागी हुने उहाँले सरकारलाई जानकारी दिनुभयो ।
संविधान र गणतन्त्रको रक्षाका लागि आफ्नो पार्टी गम्भीर रहेको पनि उहाँले बताउनुभयो ।
