काठमाडौँ । राष्ट्रिय जनमोर्चाले समसामयिक राजनीतिक परिस्थितिबारे पार्टीको धारणा सार्वजनिक गर्न मङ्सिर २१ गतेदेखि मसान्तसम्म देशव्यापी प्रचारात्मक सभा गर्ने भएका छ ।

अध्यक्ष चित्रबहादुर केसीको हस्ताक्षरमा २०८२ मङ्सिर २ गते मङ्गलबार प्रेसवक्तव्य जारी गर्दै सो जानकारी दिइएको हो ।
बुटवलमा सम्पन्न केन्द्रीय कार्यालयको बैठकले निर्णय गरेको वक्तव्यमा उल्लेख छ ।

तत्कालका लागि २१ जिल्लामा सभाको आयोजना गरिएको सो वक्तव्यमा केन्द्र्रीयस्तरको वक्तासमेत जानकारी दिइएको छ ।

जेनजी आन्दोलनपछि फागुन २१ गते चुनाव अदालतमा विचाराधीन प्रतिनिधिसभा पुन:स्थापनाबारे पार्टीको धारणा राखिएको प्रेसवक्तव्यको पूर्ण पाठ यस्तो छ :

“राष्ट्रिय जनमोर्चा केन्द्रीय कार्यालयको बैठक बुटवलमा सम्पन्न भयो । बैठकले देशको समसामयिक राजनीतिक परिस्थितिमाथि गम्भीरतापूर्वक छलफल गर्‍यो ।

देशको विद्यमान राजनीतिकको केन्द्र्रमा जेनजी आन्दोलन र त्यसबाट उत्पन्न परिस्थिति नै रहेको छ । त्यसबारे पार्टीले समय समयमा आफ्ना धारणा पनि सार्वजनिक गर्दै आएको छ । भ्रष्टाचारका विरुद्ध नारा दिएर जेनजीद्वारा सञ्चालित आन्दोलनलाई देशीविदेशी प्रतिक्रियावादी शक्तिले हाइज्याक गरेर आआफ्नो प्रतिगामी राजनीतिक उद्देश्यका लागि प्रयोग गर्न सफल भएका छन् । संसद्को विघटन, संविधान बाहिरबाट सरकारको गठनजस्ता असंवैधानिक कार्य जेनजी आन्दोलनको नाममा भएका छन् । फागुन २१ गते आमनिर्वाचनको मिति तोकिए पनि सरकारले अझै निर्वाचनका पक्षमा विश्वसनीय वातावरण बनाउन सकेको छैन । प्रतिनिधिसभा पुन:स्थापनाका लागि पनि सर्वोच्च अदालतमा रिट परेको छ । प्रतिनिधिसभा पुनस्र्थापनाको मागलाई पनि पूरै गलत भन्न सकिने अवस्था छैन ।

कतिपय शक्ति कार्यकारी प्रधानमन्त्री वा राष्ट्रपतीय निर्वाचन प्रणालीमा मुलुकलाई लैजान वर्तमान संविधानलाई खतम गर्न उद्यत छन् । मुलुकमा अहिले पनि प्रतिगमनको खतरा कायमै छ । देशको राष्ट्रियता तथा सार्वभौमसत्ताका विरुद्ध साम्राज्यवादी शक्तिले षड्यन्त्र गरिरहेका छन् । राष्ट्रियताको रक्षाका लागि विभिन्न साम्राज्यवादी शक्तिका विरुद्ध सङ्घर्ष गर्नुपर्ने आवश्यकता झन् बढेर गएको छ ।

भदौ २३ गते राज्यबाट भएको अत्यधिक र अनावश्यक बलप्रयोग तथा २४ गते भएको आगजनी र ध्वंसात्मक कार्यका लागि जिम्मेवार सरकार उच्चपदस्थ कर्मचारी तथा व्यक्ति जो जो जिम्मेवार छन्, उनीहरूलाई कारबाही गरिनुपर्दछ । २०१७ सालदेखि हालसम्म भएका भ्रष्टाचारजन्य कार्यका लागि विभिन्न सरकारमा संलग्न व्यक्ति तथा उच्चपदस्थ कर्मचारीमाथि छानबिन गरी आवश्यक कारबाही गरिनुपर्दछ ।

मुलुकका अगाडि देखा परेका यी सबै समस्याका विरुद्ध सङ्घर्ष गर्न जनताको चेतना र सङ्गठनलाई माथि उठाउनुपर्ने आवश्यकता छ । त्यही कुरालाई मध्येनजर गर्दै बैठकले यही २०८२ मङ्सिर २१ देखि मसान्तसम्म केन्द्रबाट नै केन्द्रीय वक्ताले सम्बोधन गर्ने गरी विभिन्न जिल्लामा प्रचारात्मक सभा गर्ने ठेगान भएको छ । सभा हुने जिल्ला र वक्ताको विवरण यसै वक्तव्यमार्फत् सार्वजनिक गरेका छौँ ।

१. रुपन्देही – का. चित्रबहादुर केसी, अध्यक्ष्य, राष्ट्रिय जनमोर्चा, २. बागलुङ – का. अमर थापा, केन्द्रीय सल्लाहकार, राष्ट्रिय जनमोर्चा र सुवास जिसी, अध्यक्ष, अखिल (छैठौँ), ३. प्युठान – का. दुर्गा पौडेल, उपाध्यक्ष, राष्ट्रिय जनमोर्चा ४. अर्घाखाँची – का. बोमबहादुर खत्री, नेता, राष्ट्रिय जनमोर्चा, ५. दाङ – का. मीना पुन, अध्यक्ष, अखिल नेपाल महिला सङ्घ केस, ६. बाँके – का. जनकराज शर्मा, उपाध्यक्ष, राष्ट्रिय जनमोर्चा, ७. कैलाली – मनोज भट्ट, महासचिव राष्ट्रिय जनमोर्चा, ८. कञ्चनपुर – मनोज भट्ट, महासचिव, राष्ट्रिय जनमोर्चा, ९. डोटी – मनोज भट्ट, महासचिव राष्ट्रिय जनमोर्चा, ११. सुर्खेत – रश्मीराज नेपाली, कार्यकारी अध्यक्ष, राष्ट्रिय जनमोर्चा, १२. कपिलवस्तु – भैरव रेग्मी, अध्यक्ष, अखिल नेपाल किसान महासङ्घ, १३. गुल्मी – राजेन्द्र ढुङ्गाना, केन्द्रीय सदस्य, राष्ट्रिय जनमोर्चा, १४. नवलपुर – कृष्ण अधिकारी, नेता, राष्ट्रिय जनमोर्चा, १५. काठमाडौँ – आनन्द शर्मा, केन्द्रीय सल्लाहकार, राष्ट्रिय जनमोर्चा, १६. चितवन – सानोभाइ कार्की, अध्यक्ष, अखिल नेपाल शिक्षक सङ्घ, १७. बारा – राजेन्द्र ढुङ्गाना, केन्द्रीय सदस्य, राष्ट्रिय जनमोर्चा, १८. नवलपरासी – बद्रे आलम, केन्द्रीय सल्लाहकार, राष्ट्रिय जनमोर्चा, १९. पाल्पा – सुरेश थापा, नेता, राष्ट्रिय जनमोर्चा, २०. रोल्पा – ज्ञामुराम न्यौपाने, नेता, राष्ट्रिय जनमोर्चा, २१. कास्की – शङ्कर बराल, केन्द्रीय सदस्य, राष्ट्रिय जनमोर्चा ।

यी बाहेकका अन्य जिल्लाले पनि जिल्लास्तरीय सभा गर्ने ठेगान भएको छ । सम्भव भएका सबै जिल्लामा पार्टीले केन्द्रीय वक्ता पठाउनेछ ।

पार्टीद्वारा आह्वान गरिएको प्रचारात्मक सभालाई सफल पार्न सम्पूर्ण पार्टी कमिटी, जनवर्गीय सङ्गठन तथा सम्पूर्ण जनसमुदायमा हार्दिक अपिल गर्दछौँ ।”