ढोरपाटन (बागलुङ) । दरमखोला हाइड्रोपावरले व्यावसायिक उत्पादन थालेको छ । २०७७ सालदेखि निर्माण सुरु भएको हाइड्रोपावरबाट २०८२ कात्तिक ३० गते आइतबारदेखि व्यवसायिक उत्पादन सुरु गरिएको हो ।

दरमखोला हाइड्रो इनर्जी लिमिटेडमार्फत सञ्चालनमा आएको हाइड्रोपावर गत असोज ३० गते केन्द्रीय प्रसारण लाइनमा जडान गरिएको थियो । २०६५ सालमा हाइड्रोपावर निर्माण गर्ने भनिए पनि २०७७ देखि मात्रै काम सुरु भएको हाइड्रोपावरको उत्पादन क्षमता नौ दशमलव छ मेगावाट छ ।
सुरुमा गोर्खा हाइड्रोपावर कम्पनीले निर्माण गर्ने भने पनि अहिले दरमखोला हाइड्रो इनर्जी प्रालीले जिम्मा लिएको छ ।

गलकोट नगरपालिका–८ काँडेबासमा ड्याम निर्माण गरी साढे चार किलोमिटर पश्चिम मनेवापाटामा विद्युतगृह निर्माण गरी विद्युत् उत्पादन सुरु गरिएको हाइड्रोपावरका इन्जिनियर मिथिलेस चौधरीले जानकारी दिनुभयो ।

बर्खामा नौ दशमलव छ मेगावाट विद्युत् उत्पादन गर्न सकिने भए पनि हिउँद याममा छ दशमलव छ मेगावाट मात्रै उत्पादन भइरहेको उहाँले बताउनुभयो ।

चौधरीले भन्नुभयो– ‘दरमखोला हाइड्रोपावरलाई नेपाल विद्युत् प्राधिकरणको प्रसारण लाइनमा जोडिएको छ । विद्युतगृहभन्दा १४ किलोमिटर पूर्वमा रहेको हरिचौर सबस्टेसनमा जोडिएको छ । प्रसारण लाइनमा एक महिनाअगाडि नै जोडे पनि व्यावसायिक उत्पादन भने अहिले बल्ल नियमित हुन थालेको छ । बर्खामा नौ दशमलव छ मेगावाट उत्पादन गर्न सकिने भए पनि अहिले सकिँदैन ।’

हाइड्रोपावर निर्माणको जिम्मा रामेछाप शेर्पा कन्स्ट्रक्सन र क्रिमहाइडल लिमिटेड पाएका थिए । हाइड्रोपावर निर्माण गर्दा विभिन्न अवरोध हुँदा निर्माण सम्पन्न गर्न समय लागेको दरमखोला हाइड्रोइनर्जीका अध्यक्ष नरबहादुर पुनले बताउनुभयो ।

सुरुमा गोर्खा हाइड्रोपावर कम्पनीले बनाउने गरी इजाजत पाए पनि उक्त कम्पनीले काम नगरेपछि आफूले सुरु गरेको उहाँको भनाइ छ ।
निर्माण सम्पन्न गर्न रु दुई अर्ब बढी लगानी भएको अध्यक्ष पुन बताउनुहुन्छ । हाइड्रोपावरबाट विद्युत् उत्पादन हुन थालेपछि बागलुङका विकट गाउँ बस्तीमा विद्युत् पुग्ने अपेक्षा लिएको उहाँको भनाइ छ ।

‘दरमखोला हाइड्रोपावर बागलुङमा अहिलेसम्म बनेकामध्ये सबैभन्दा ठुलो हाइड्रोपावर हो । यसको सर्भे धेरै वर्ष अगाडि भए पनि विभिन्न समस्याका कारण अलि ढिला काम थाल्यौँ यद्यपि अहिले उत्पादन गर्ने स्थितिमा आएको छ’ अध्यक्ष पुनले भन्नुभयो– ‘१७ वर्ष अगाडि गोर्खा हाइड्रोपार कम्पनीले इजाजत पाएको थियो । त्यसलाई रद्द गरेर हामीले नयाँ कम्पनी बनाएर काम गर्‍यौँ । अहिले सम्पन्न भएर सकियो ।’ (रासस)