बुटवल । रुपन्देहीको बुटवलमा नेकपा (मसाल) सम्बद्ध युवाविद्यार्थीसहित दुईदिने अगुवा कार्यकर्ता प्रशिक्षण कार्यक्रम सम्पन्न भएको छ ।
राष्ट्रिय जनमोर्चा लुम्बिनी प्रदेश कार्यालयको सभाकक्षमा २०८२ कात्तिक २८–२९ गते सो कार्यक्रम सम्पन्न भएको हो ।
मसालको रुपन्देही जिल्ला प्रवक्ता लालचन्द पन्थको सञ्चालनमा अघि बढेको उक्त कार्यक्रममा जेनजी आन्दोलन र देशको समसामयिक परिस्थितिबारे राजमो अध्यक्ष चित्रबहादुर केसीले प्रशिक्षण दिनुभएको थियो ।
त्यस्तै दर्शनको बारेमा अखिल नेपाल बुद्धिजीवी सङ्घका सचिवालय सदस्य दुर्गानाथ खरेलले, समसामयिक राजनीतिक परिस्थितिको बारेमा बुद्धिजीवी सङ्घकै केन्द्रीय सदस्य लीलाबहादुर जिसीले, जेनजी आन्दोलनमा राजनीतिक दलको प्रभावबारे तराई मधेस जनवादी मोर्चाका अध्यक्ष बद्रे आलमले र आगामी चुनावप्रति राजमोको दृष्टिकोणबारे कम्युनिस्ट सङ्ग्रहालयका अध्यक्ष चेतनाथ आचार्यले प्रशिक्षण दिनुभएको थियो ।
दोस्रो दिन युवाविद्यार्थीको प्रशिक्षण कार्यक्रम सम्पन्न भएको थियो ।
कार्यक्रममा जेनजी आन्दोलन र युवाविद्यार्थीको भूमिकाबारे अध्यक्ष केसीले, दर्शनबारे सचिवालय सदस्य खरेलले र जेनजी आन्दोलनको प्रभावबारे कम्युनिस्ट सङ्ग्रहालयका अध्यक्ष आचार्यले प्रशिक्षण दिनुभएको थियो ।
जिल्ला प्रवक्ता पन्थको अध्यक्षता तथा अखिल नेपाल युवक सङ्घ रुपन्देहीका अध्यक्ष मिलन पोखरेलको सञ्चालनमा अघि बढेको उक्त कार्यक्रममा उपस्थित सहभागीलाई अखिल (छैठौं) का जिल्ला अध्यक्ष कुलचन्द्र खनालले गर्नुभएको थियो ।
कार्यक्रममा युवाविद्यार्थीले राखेका जिज्ञासाको उत्तर दिइएको थियो ।
कार्यक्रममा मणिग्रामस्थित शान्ति नमुना माध्यमिक विद्यालयबाट २०८२ सालको एसइईमा शत्प्रतिशत चार जिपिए ल्याएकी छात्रा सम्पदा विकलाई अध्यक्ष केसीले प्रशंसापत्र हस्तान्तरण गर्नुभएको थियो ।
