काठमाडौँ । नेकपा (एकीकृत समाजवादी) का स्थायी कमिटी सदस्य रामकुमारी झाँक्रीसहितका केही नेताहरुले नेकपा (माओवादी केन्द्र) सहित १० कम्युनिष्ट पार्टीबीच हुने एकता प्रक्रियामा सामेल नहुने बताउनुभएको छ ।
आज यहाँ पत्रकार सम्मेलन गरी नेत्री झाँक्री र विघटित प्रतिनिधिसभाका सदस्य किसान श्रेष्ठले पार्टीको तर्फबाट एकीकरणका पक्षमा निर्णय भएपनि आफूहरू त्यसमा सहभागी नहुने स्पष्ट गर्नुभएको हो ।
एकता र विभाजनका शर्तहरुमा अगाडि जाने गन्तव्यका बारेमा स्पष्ट सोच हुनुपर्ने तथा सिद्धान्त र कार्यक्रम मिल्नेसँग एकता गर्ने नेत्री झाँक्रीले बताउनुभयो ।
यसैगरी नेता श्रेष्ठले नेकपा (एमाले) ले पुरानै घरमा फर्कन अनुरोध गरिरहेको सन्दर्भमा निशर्तरुपमा एमालेमा फर्कन चाहेको बताउनुभयो ।
पत्रकार सम्मेलनमा एकीकृत समाजवादीका नेता पीताम्बर तिमिल्सनालगायत सहभागी हुनुहुन्थ्यो ।
नेकपा (माओवादी केन्द्र) र नेकपा (एकीकृत समाजवादी)लगायत दलहरुबीच आज एकता घोषणा हुन लागेको सन्दर्भमा पत्रकार सम्मेलनमार्फत सो जानकारी दिनुभएको हो ।
