काठमाडौं । सर्वोच्च अदालतले देशभरका जेनजी आन्दोलनमा अदालतमा भएको तोडफोड र क्षतिमा संलग्नहरूलाई कारबाहीको माग गरी प्रहरीमा जाहेरी दिने भएको छ ।
गत आइतबार सबै न्यायाधीश पूर्ण बैठकले प्रहरीमा जाहेरी दिने निर्णय गरेको हो ।
जाहेरी दिने काममा न्यायाधीश नभई सर्वोच्च अदालत प्रशासनका उच्च अधिकारीहरू संलग्न हुनेछन् । सम्भवतस् मुख्यरजिष्ट्रार वा रजिष्ट्रारहरूको नामबाट जाहेरी पेश हुनेछ ।
जेन–जी आन्दोलनमा भएको दमनको भोलीपल्ट देशव्यापी रुपमा भएको तोडफोड र आगजनीका कारण रामशाहपथस्थित सर्वोच्च अदालत आगजनीले ध्वस्त भएको थियो । करिब तीन दिनसम्मको आगोले अदालतमा विचाराधीन करिव २० हजार मुद्दाका फाइल जलेका छन् भने फैसला भइसकेका एक लाख ९७ हजार फाइल नष्ट भएका छन् ।
आगजनीले न्यायाधीश, कर्मचारीले प्रयोग गरेका ५० भन्दा बढी चारपाङ्ग्रे सवारीसाधन अदालत परिसरमा रहेका करिव डेढ सयभन्दा बढी मोटरसाइकल जलेका थिए ।
त्यसक्रममा अदालतमा आएका सेवाग्राही र कानून व्यवसायीका केही गाडी र मोटरसाइकल पनि जलेको अनुमान छ ।
सर्वोच्च अदालत मात्रै नभई अरु अदालतको आगजनी र तोडफोडमा संलग्नहरूमाथि समेत कारवाहीको मागको विवरण जाहेरीमा समावेश गर्ने सर्वोच्च अदालत प्रशासनको तयारी छ । काठमाडौंमा सर्वोच्च सहित विशेष अदालत र जिल्ला अदालत काठमाडौं आगजनीका कारण क्षतिग्रस्त भएका छन् ।
