बुटवल । राष्ट्रिय जनमोर्चा रुपन्देहीका अध्यक्ष तथा नेकपा (मसाल) रुपन्देहीका सचिवालय सदस्य टानबहादुर केसीको बुटवलकै मगरघाटमा दाहसंस्कार गरिएको छ ।

२०८२ कात्तिक ६ गते साँझ निधन भएका केसीको आज कात्तिक ७ गते शुक्रबार दाहसंस्कार गरिएको हो ।

दाहसंस्कारपूर्व केसीको स्मृतिमा घाटमै शोकसभा सम्पन्न भएको थियो ।

केसीको पृष्ठभूमिबारे जानकारी गराउँदै राजमो रुपन्देहीका गङ्गालाल सापकोटाको सञ्चालनमा अघि बढेको सो कार्यक्रममा नेकपा (मसाल) रुपन्देहीका प्रवक्ता लालचन्द पन्तले पार्टीको झन्डा ओढाउनुभएको थियो । सँगै उहाँले शोकवक्तव्यसमेत वाचन गर्नुभएको थियो ।

कार्यक्रममा राजमो केन्द्रीय सदस्य तथा भूमिकास्थान नगरपालिकाका प्रमुख झबिलाल थापा र बुटवल उपमहानगरपालिकाका प्रमुख खेलराज पाण्डेयले शोकमन्तव्य राख्नुभएको थियो ।

शोकसभामा जातीय समता समाजका अध्यक्ष तथा राष्ट्रियसभाका सांसद राजेश विश्वकर्मा, राजमो केन्द्रीय सदस्यहरू लालबहादुर थापा र सागर केसी,, क्रान्तिकारी कम्युनिस्ट पार्टीका पिबिएम प्रेम सुवेदी, नेकपा (एमाले) का गिरधारीलाल न्यौपाने, नेकपा (माओवादी केन्द्र) का निर्मल जिसी, नेपाल कम्युनिस्ट पार्टीका पिबिएम बसन्त श्रेष्ठ, नेकपा (माले) का गोपालमणि पौडेल, अखिल नेपाल टे«ड युनियन महासङ्घ (अन्टुक) का अध्यक्ष लोकराज भुसाल, कम्युनिस्ट सङ्ग्रहालयका अध्यक्ष चेतनाथ आचार्य, भूमिकास्थान–३ का अध्यक्ष कृष्ण बन्जाडे, वडा नं. ४ का अध्यक्ष बाबुराम पन्थी, बुटवल उपमनपा–१९ का अध्यक्ष चन्द्रसिंह थापा, वडा नं. ४ का नरिश्वर शर्मालगायत परिवार, सम्बद्ध पार्टी, राजनीतिक दलका नेताकार्यकर्ता र स्थानीयवासीको उपस्थिति थियो ।

कात्तिक ६ गते भाइटिकाका दिन टिका लगाइसकेपछि नाचिरहेका बेला बेहोस हुनुभएका केसीलाई बुटवल अस्पताल प्रालिमा ल्याइपुर्‍याउँदा चिकित्सकले मृत घोषणा गरेका थिए ।

२०२७ भदौ २६ गते अर्घाखाँचीको भूमिकास्थान–४ साना अवलमा जन्मनुभएका केसी भारतमा मूल प्रवाह अखिल भारत नेपाली एकता समाज नयाँदिल्ली नगर समितिका सचिव तथा अर्घाखाँची र रुपन्देहीमा मसालसम्बद्ध जनवर्गीय सङ्गठनमा समेत सक्रिय रहँदै आउनुभएको थियो ।

नयाँदिल्लीमै रहँदा सन् १९९६ मा उहाँले मसालको सदस्यता प्राप्त गर्नुभएको थियो ।

पछिल्लो समय बुटवल उपमनपा–१९ नहरपुरमा बस्दै आउनुभएका केसी बुबा तिलबहादुर खत्री र आमा तैसरा खत्रीको कोखबाट जन्मिनुभएको थियो । दुई दाजुभाइ तथा तीन दिदीबहिनीमध्ये केसी कान्छो छोरा हुनुहुन्थ्यो । उहाँको परिवारमा पत्नी लक्ष्मी केसी तथा तीन छोराहरू राजन केसी, अभिषेक केसी र राहित केसी रहेका छन् ।