काठमाडौँ । राष्ट्रिय जनमोर्चा रुपन्देहीका अध्यक्ष टानबहादुर केसीको असामयिक निधन भएको छ ।
२०८२ कात्तिक ६ गते बिहीबार भाइटिका लगाउँदै गरेका केसी अचानक बेहोस भएपछि अस्पताल पुर्याउँदै गर्दा उहाँको निधन भएको हो ।
राजमो रुपन्देहीका गङ्गालाल सापकोटाले युगदर्शनलाई दिनुभएको जानकारीअनुसार बुटवल–१९ स्थित आफ्नै निवासमा भाइटिका लगाउँदै गर्दा ५५ वर्षीय केसी बेहोस भएर ढल्नुभएको थियो । उपचार बुटवल अस्पताल प्रालिसम्म पुर्याउँदा–पुर्याउँदै उहाँको निधन भएको थियो ।
मसालद्वारा श्रद्धाञ्जली
यता, नेकपा (मसाल) को पार्टीसदस्यसमेत रहनुभएका केसीको असामयिक निधनप्रति सो पार्टीले श्रद्धाञ्जली तथा शोकसन्तप्त परिवारजनप्रति समवेदना व्यक्त गरेको छ ।
आजै महामन्त्री मोहनविक्रम सिंहको हस्ताक्षरमा शोकवक्तव्य जारी गर्दै पार्टीले उहाँप्रति श्रद्धाञ्जली व्यक्त गरेको हो ।
वक्तव्यमा भनिएको छ– “हाम्रो पार्टीका सदस्य रहनुभएका टानबहादुर केसीको आजै भएको असामयिक निधन भएकोमा उहाँप्रति श्रद्धाञ्जली व्यक्त गर्दछौँ र शोकसन्तप्त परिवारजनप्रति गहिरो समवेदना व्यक्त गर्दछौँ ।
का. केसीले प्रवास र स्वदेशमा पार्टी, जनवर्गीय मोर्चा र सङ्गठनका विभिन्नस्तरका जिम्मेवारी निर्वाह गरिसक्नुभएको थियो । पछिल्लो समयमा उहाँ हाम्रो पार्टीको रुपन्देही जिल्लाको सचिवालय सदस्य तथा वैधानिक मोर्चाको जिल्ला अध्यक्ष हुनुहुन्थ्यो । उहाँको असामयिक निधनबाट हाम्रो पार्टीको आन्दोलनलाई गम्भीर क्षति पुगेको छ ।
अन्तमा पुन: उहाँप्रति श्रद्धाञ्जली व्यक्त गर्दछौँ ।”
मसालको रुपन्देही जिल्ला पार्टीले दिएको जानकारीअनुसार उहाँको पार्टीमा टेक नाम क. रिकर्ड रहेको थियो ।
उहाँले भारत प्रवासमा मूल प्रवाह अखिल भारत नेपाली एकता समाज र रुपन्देहीमा राष्ट्रिय जनमोर्चा तथा अन्य विभिन्न जनवर्गीय सङ्गठनको जिम्मेवारी निर्वाह गरिसक्नुभएको थियो ।
उहाँको परिवारमा पत्नी र तीन छोराहरू रहेका छन् ।
पारिवारिक स्रोतका अनुसार केसीको दाहसंस्कार भोलि कात्तिक ७ गते शुक्रबार बिहान ६ बजे स्थानीय मगरघाटमा गरिने बताएको छ ।
त्यस्तै दाहसंस्कारपूर्व शोकसभा आयोजना गरिने पनि राजमो रुपन्देहीले जानकारी दिएको छ ।
