काठमाडौँ । विपिन जोशीको मृत्युप्रति राष्ट्रिय जनमोर्चाले श्रद्धाञ्जली व्यक्त गरेको छ ।
उपाध्यक्ष तथा प्रवक्ता दुर्गा पौडेलको हस्ताक्षरमा २०८२ असोज २७ गते राति जारी शोकवक्तव्यमा जोशीप्रति श्रद्धाञ्जली तथा शोकसन्तप्त समवेदना व्यक्त गरिएको हो ।
जोशीको निधन उनको परिवारको विषय मात्र नभएर सम्पूर्ण नेपालीको भएको बताउँदै वक्तव्यमा राजमोले शोकवक्तव्य जारी गरेको छ ।
यस्तो छ, शोकवक्तव्यको पूर्ण पाठ :
“हमास र इजरायलको बिचमा शान्ति सम्झौता भएको अवस्थामा हमासले बन्धक बनाएका मानिसहरू छुट्ने सम्भावना देखा परेको थियो र अहिले तिनीहरूमध्ये कैयौँ जना छुटी पनि सकेका छन् । त्यो क्रममा विपिन जोशीको पनि उत्सुकतापूर्वक प्रतीक्षा भइरहेको थियो । त्यही बेलामा उनी जीवित नरहेको समाचारबाट सम्पूर्ण नेपाली र हाम्रो पार्टी राष्ट्रिय जनमोर्चासमेत स्तब्ध हुन पुगेको छ ।
हमासको आक्रमणबाट ठुलो सङ्ख्यामा इजरायलीको मृत्यु हुनुका साथै १० जना नेपाली विद्यार्थीको हत्या गरिएको थियो र एक जना विपिन जोशी बन्धक बनाइएका थिए । केही समय पहिलेसम्म पनि उनी जीवित नै रहेको र उनी छिटै छुट्ने समाचार बाहिर आएको थियो । अकस्मात् उनी जीवित नरहेको समाचार आउनु अत्यन्त दुखद् कुरा हो ।
अहिले विभिन्न समाचार सूत्रबाट उनको शवसमेत हमासले इजरायललाई प्रदान गरेको समाचार आएको छ र इजरायलस्थित नेपाली दूताबासले पनि त्यही प्रकारको समाचार दिएको छ । त्यो अवस्थामा हामीले उनीप्रति उच्च प्रकारको श्रद्धाञ्जली प्रकट गर्दै उनका शोकसन्तप्त परिवारप्रति पनि हार्दिक समवेदना प्रकट गर्दछौँ ।
उनकी आमा र बहिनीले विपिन जोशीलाई छुटाउन इजरायल र अमेरिकासम्म पुगेर दौडधुप गरेका थिए । अहिले उनको मृत्युको समाचारले उनीहरूलाई कति ठुलो चोट पुगेको होला ? कसैले पनि सो कुराको अनुमान गर्न सक्दछ । वास्तवमा विपिन जोशीको मृत्युबाट पुगेको शोक उनको परिवारको मात्र नभएर त्यो राष्ट्रिय विषय भएको छ । त्यसका लागि हामी सम्पूर्ण नेपालीको तर्फबाट दु:ख प्रकट गर्दछौँ ।”
