काठमाडौं । नेपाल कम्युनिष्ट पार्टी (मसाल) ले पार्टीका सदस्य धनबहादुर जिसी (क. कपिल) को निधनले पार्टीलाई गम्भीर क्षति पुगेको बताएको छ । महामन्त्री मोहनविक्रम सिंहले शनिबार एक वक्तव्य प्रकाशित गरी उहाँ इमान्दार, असल, अनुशासित एवम् सक्रिय पार्टी सदस्य रहेको बताउनुभएको छ ।
बर्दियाको बारबर्दिया–१० बैदी निवासी जिसीको हिजो शुक्रबार निधन भएको थियो । उहाँको आज (शनिबार) बिहान स्थानीय भादा नदीमा अन्तिम संस्कार गरिएको छ । महामन्त्री सिंहले स्वर्गीय जिसीप्रति श्रद्धाञ्जली अर्पण गर्दै शोक सन्तप्त परिवारजनमा गहिरो समवेदना प्रकट गर्नुभएको छ ।
वक्तव्यमा भनिएको छ, ‘नेपाल कम्युनिस्ट पार्टी (मसाल) का सदस्य का. धनबहादुर जिसी (का. कपिल) को २०७७ असार १२ गते ५५ वर्षको उमेरमा मृत्यु भएको छ । का. जिसीको परिवार २०५२ सालमा प्यूठानबाट बसाइ सराई गरी बर्दिया जिल्लाको हालको बारबर्दिया नगरपालिका वडा नं १० मा बसोबास गर्दै आएको छ ।
पञ्चायत कालदेखि नै हाम्रो पार्टीमा सङ्गठित भई सक्रिय हुनुभएका का. जिसी हाल पार्टीको नगर समिति सेक्रेटरी हुनुहुन्थ्यो । उहाँले केही समयदेखि सुगर र ब्लडप्रेसर रोगको उपचार गराइरहनुभएको थियो । त्यही उपचारको क्रममा उहाँको मृत्यु भएको छ । उहाँ इमान्दार, असल, अनुशासित एवम् सक्रिय पार्टी सदस्य हुनुहुन्थ्यो । उहाँको मृत्युबाट पार्टीलाई गम्भीर क्षति पुगेको छ । हाम्रो पार्टीले उहाँप्रति श्रद्धाञ्जली व्यक्त गर्दै उहाँको परिवारजनप्रति हार्दिक समवेदन प्रकट गर्दछ ।’
यस्तै, नेकपा (मसाल) बर्दियाले पनि शोक वक्तव्य प्रकाशित गरी जिसीप्रति श्रद्धाञ्जली अर्पण गरेको छ । जिल्ला सेक्रेटरी रेशमले जारी गर्नुभएको वक्तव्यमा स्वर्गीय जिसीको निधनले पार्टीलाई गम्भीर क्षति पुगेको उल्लेख छ ।
यो पनिः राजमो नेता जिसीको निधन
