रबात । उत्तर अफ्रिकी देश मोरोक्कोमा स्वास्थ्य र शिक्षा सुधारको माग राख्दै सुरु भएको जेनजी आन्दोलन हिंसात्मक बनेको छ । राजधानी रबातमा प्रदर्शनकारीहरूले बैंक लगायत विभिन्न सरकारी कार्यालयहरूमा आगजनी गरेका छन् । त्यस्तै कैयौँ पसल र गाडीहरूमा तोडफोड भएका छन् ।

अगादीर शहरमा प्रहरीले गोली लागेर ३ जना युवाको मृत्यु भएको बताइएको छ । त्यस्तै, हजारभन्दा बढी मानिसहरू पक्राउ परेका छन् । ३५४ जना घाइते भएका छन्, जसमध्ये धेरैजसो सुरक्षा कर्मचारी हुन् । मन्त्रालयका अनुसार, करिब ७०% प्रदर्शनकारी नाबालिग रहेका छन् ।

मोरोक्को सरकारले २०३० फीफा विश्वकप र अफ्रिका कप अफनेशन्सका लागि १० अर्ब डलर खर्च गरिरहेको छ । जबकि देशका सरकारी अस्पतालहरूमा सुविधाहरू निकै कम छन् ।

मोरक्कोमा प्रदर्शनकारीहरूको कुनै नेता छैन

सिएनएनका अनुसार युवाहरूको नेतृत्वमा भएको यो विरोध आन्दोलनलाई जेनजी २१२ भनिँदैछ । २१२ मोरक्कोको अन्तर्राष्ट्रिय टेलिफोन डायलिङ कोड हो । विदेशबाट मोरक्कोमा कसैलाई कल गर्दा नम्बरको अगाडि +२१२ राखिन्छ ।

नेपाल जस्तै मोरक्कोमा पनि विरोध प्रदर्शन गर्ने युवाहरूको कुनै नेता नभएको बताइएको छ । रिपोर्ट अनुसार मानिसहरू सामाजिक सञ्जाल मार्फत र्‍याली गर्दैछन् । मोरक्कोमा बेरोजगारी दर १२.८% छ, जसमा युवा बेरोजगारी ३५.८% र स्नातकहरूमा १९% पुगेको तथ्याङ्क बताउँछ । मोरक्कोमा १४३० जनामा एकजना डाक्टर मात्र छन्, जुन विश्वको औसत (५९०) भन्दा दुई तिहाइ कम हो ।

डिस्कोर्ड–टिकटक एपबाट आन्दोलन

यो आन्दोलन सामाजिक सञ्जाल प्लेटफर्म जस्ता टिकटक र डिस्कोर्डमा सुरु भएको थियो । गत आइतबार प्रदर्शनकारी पक्राउ परेपछि यसलाई अझ समर्थन मिल्न सुरु भएको बताइएको छ । पक्राउ पर्ने व्यक्तिहरूमा मोरोक्कोका स्टार गोलकिपर यासिन बौन्नू र प्रसिद्ध र्यापर एल ग्रान्डे टोटो पनि समावेश छन्।

त्यसपछि बुधबार हिंसात्मक प्रदर्शन तीव्र भए । राजधानी रबात, मुख्य व्यावसायिक शहर कासाब्लान्का र बन्दरगाह शहर टांगीरमा पनि विरोध प्रदर्शन भएका थिए । स्थानीय सञ्चारमाध्यमले उल्लेख गरे अनुसार पर्यटकीय केन्द्र माराङ्समा पनि हिंसा भएको र प्रदर्शनकारीहरूले एक पुलिस स्टेशन जलाएका थिए ।

गृह मन्त्रालयका प्रवक्ता राशिद अल खल्फीका अनुसार अस्थिरता पछि सम्पूर्ण मोरोक्कोमा ४०९ जनालाई नियन्त्रणमा लिइएको छ । २६० भन्दा बढी पुलिस अधिकारी र २० प्रदर्शनकारी घाइते भए र ४० पुलिस सवारीसाधन र २० निजी कारमा आगजनी भएको छ ।

यो विद्रोह नेपाल, इन्डोनेशिया, फिलिपिन्स र मडागास्करमा गत महिनामा युवाहरूको नेतृत्वमा भएको ठूला प्रदर्शनपछि भएको हो । नेपालको विरोधका कारण प्रधानमन्त्रीले राजीनामा दिनु पर्यो, भने मडागास्करका राष्ट्रपतिले प्रदर्शनकारीहरूलाई शान्त पार्ने प्रयासमा आफ्‌नो सरकार विघटन गरे ।