गण्डकी । आज पोखरामा विभिन्न कार्यक्रमको आयोजना गरी ४६औँ विश्व पर्यटन दिवस मनाइएको छ । पोखराको लेकसाइड, बेगनासताल, पुम्दिभुम्दीलगायत स्थानमा छुुट्टाछुुट्टै कार्यक्रम गरी दिवस मनाइएको हो ।

पोखरा पर्यटन परिषद् र नेपाल पर्यटन बोर्ड गण्डकी प्रदेशको संयुक्त आयोजना तथा पोखराका पर्यटनसम्बद्ध सङ्घसंस्थाको सहकार्यमा विदेशी पर्यटकसहित लेकसाइडडको अम्मटबाट नेपाल पर्यटन बोर्डको कार्यालय ड्यासाइडसम्म प्रभात फेरी गरिएको थियो ।

प्रभातफेरी पछि पर्यटन बोर्डमा आयोजित कार्यक्रममा विशेष वक्ताका रूपमा बेलायतका टोनी जोन्स र बङ्गलादेशकी मोनिका चौधरीले नेपालको समग्र पर्यटन, सम्भावना, चुनौतीलगायत विषयमा चर्चा गर्नुभयो ।

पोखरा पर्यटन परिषद्का अध्यक्ष तारानाथ पहारी, पर्यटन बोर्ड गण्डकी प्रदेशका प्रमुख मणिराज लामिछाने, पोखरा भ्रमण वर्ष-२०२५ कार्यसम्पादन समितिका संयोजक गोपिबहादुर भट्टराई, पर्यटन बोर्डका पूर्वसदस्य गणेशबहादुर भट्टराई, पर्यटन परिषद्का महासचिव जीवनराज सापकोटालगायत वक्ताले विभिन्न चुनौतीकाबीच रहेको पर्यटन क्षेत्रलाई अघि बढाउन सबैको एकताबद्ध प्रयास आवश्यक हुनेमा जोड दिनुभयो ।

पर्यटन दिवसका अवसरमा आज काठमाडौँबाट पोखरा अन्तरराष्ट्रिय विमानस्थलमा यती एयरलायन्समार्फत आएका स्वदेशी तथा विदेशी यात्रुलाई स्वागत गरिएको पर्यटन परिषद्का महासचिव सापकोटाले जानकारी दिनुभयो ।

उक्त उडानमार्फत आएका यात्रुलाई पोखरास्थित अन्तरराष्ट्रिय पर्वतीय सङ्ग्रहालयमा निःशुल्क प्रवेशका साथै अन्नपूर्ण केबुलकारमा ५० प्रतिशत छुटसहितको टिकट उपलब्ध गराइएको थियो ।

त्यस्तै, काठमाडौँबाट स्थलमार्ग हुँदै यति एडभेन्चर ट्राभल्स र न्यरोड ट्राभल्सका पर्यटक बसमा आएका यात्रुुहरूलाई पोखरास्थित पर्यटक बसपार्कमा स्वागत गरिएको थियो । उक्त यातायतमार्फत आउने दुुई जना यात्रुलाई नाट्टा गण्डकी प्रदेशका तर्फबाट पोखरा-काठमाडौँ बसको निःशुल्क टिकट पनि उपलब्ध गराइएको थियो ।

दिवसका अवसरमा पर्यटनसम्बद्ध विभिन्न सङ्घसंस्थाबाट विशेष छुटका योजना पनि घोषणा गरिएको महासचिव सापकोटाले जानकारी दिनुुभयो । होटेल तथा रेष्टुरेन्ट एसोसिएसन लेखनाथको आयोजनामा आज बेगनासतालमा पनि विशेष कार्यक्रम गरिएको छ । यहाँस्थित नहर चोकबाट मन्धरे पार्कसम्म प्रभातफेरीसँगै सहभागी मोटरबोटमार्फत बेगनास बराह मन्दिर पुगेर सभा गरिएको थियो ।

उक्त कार्यक्रममा नेपाल पर्यटन बोर्ड गण्डकी प्रदेशका प्रमुख मणिराज लामिछाने, होटल तथा रेष्टुरेन्ट एसोसिएसन लेखनाथका अध्यक्ष वीरभद्र कँडेल, पूर्वअध्यक्ष दामोदरभक्त थापा, कोषाध्यक्ष शक्तिश्री कोइरालालगायतले लेखनाथ क्षेत्रको पर्यटन विकास र सम्भावनाका सम्बन्धमा चर्चा गर्नुभएको थियो । पर्यटन दिवसकै अवसरमा पोखराको पुम्दीभुम्दीमा आजै दोस्रो पर्वतीय दौड प्रतियोगिता सम्पन्न भएको छ ।