इन्टरनेटको विश्वव्यापी पहुँच, तीव्रता र व्यापकतामाथि ध्यान दिँदै हामीले युगदर्शनको वेबसाइटको सुरुआत गरेको पनि आज छैटौँ वर्ष पूरा गरी सातौँ वर्षमा प्रवेश गरेको छ ।
यसको सुरुआत २०७६ असोज ७ गते गरिएको थियो । यो सुखद अवसरमा हाम्रा पाठक, स्थापना समयदेखि हालसम्म योगदान पुराउनु हुने सम्पूर्ण स्टाफ, लेखक, संवाददाता, विज्ञापनदातालगायत एवम् विभिन्न कोणबाट सहयोग पुर्याउँदै आउनुभएका यहाँहरू सम्पूर्णमा कृतज्ञतासहित हार्दिक शुभकामना व्यक्त गर्दछौँ ।
आजको युग सूचना साम्राज्यको युग हो । अब युग एआईको युगमा प्रवेश गरिसकेको छ, जहाँ एआईको माध्यमबाट आफ्नो कल्पनाले भ्याएजतिका सामग्री प्राप्त गर्न सकिन्छ । विश्वको कुनै पनि कुनामा बसे पनि एउटा सोसल साइटको अप्लिकेसन थिच्नेबित्तिकै हजारौँलाखौँ सूचना प्राप्त गर्न सकिन्छ तर ती सूचना आफैमा सान्दर्भिक, सत्य, वैज्ञानिक र क्रान्तिकारी हुन्छन् भनेर विश्वास गर्ने आधार भने अत्यन्तै थोरै हुन्छन् । यसै पनि कपोकल्पित भ्रामक समाचार र सूचनालाई भाइरल बनाएर रातारात चर्चित बन्ने गरेको सन्दर्भबाट पनि हामी अनभिज्ञ छैनौँ । त्यस प्रकारको समस्याका विरुद्ध सच्चा र स्वच्च प्रकारले श्रमजीवीको आवाज बुलन्द गर्ने सूचना संवाहकको महसुस गरेर नै हामीले यो ‘युगदर्शन डट कम’ वेबसाइट सञ्चालनमा ल्याएका थियौँ । त्यस कार्यमा हामी निरन्तर सक्रिय रहँदै आएका छौँ ।
हाम्रो उदेश्य अत्यन्तै महत्त्वपूर्ण रहँदारहँदै पनि विभिन्न समस्याले विश्वभरि पुगेर रहनुभएका श्रमजीवी नेपालीलाई एकै ठाउँमा ल्याउने सवालमा हामी सङ्घर्षरत छौँ । यस सन्दर्भमा देशमा रोजगारीको अभावमा प्रवासिन बाध्य नेपाली श्रमजीवीका आवाजलाई ‘युगदर्शन डट कम’ वेबसाइटबाट बाहिर ल्याउने काममा निरन्तर जुधिरहेका छौँ । त्यसका साथै नेपालको राष्ट्रिय राजनीतिमा देखिने समस्याबारे बढीभन्दा बढी प्रकाश पार्ने प्रयत्न पनि गर्दै आएका छौँ । हामीले नेपालको प्रजातान्त्रिक, वामपन्थी र क्रान्तिकारी कम्युनिस्ट आन्दोलनसित जोडिएका राजनीतिक, वैचारिक समस्यामाथि प्रकाश पार्ने सवाललाई पनि उत्तिकै प्राथमिकता दिँदै आएका छौँ ।
जनतासँग जोडिएका समाचार, फिचरलाई लगातार अद्यावधिक गर्ने हाम्रो प्रयत्न रहेको छ, भविष्यमा पनि रहनेछ । त्यसका अतिरिक्त जहाँसुकै रहेर पनि नेपाली समाजजले भोग्नुपरेका समस्याबारे बढीभन्दा बढी सामग्री दिन, उनीहरूका सामाजिक, राजनैतिक, सांस्कृतिक क्रियाकलापबारे सूचना प्रेषित गर्न पनि हामी उत्तिकै प्रयत्नरत छौँ ।
अन्तर्राष्ट्रिय तहका समस्या, विश्व कम्युनिष्ट आन्दोलन, त्यसका वैचारिक समस्याबारे पनि सक्दो सामग्री उपलब्ध गराउनेतर्फ हाम्रो प्रयास रहँदै आएको छ । ती सबैका अतिरिक्त प्रगतिशील साहित्य, गीतसङ्गीतसित जोडिएका सूचना, विचार सम्प्रेषण गर्नेतर्फ पनि हाम्रो ध्यान केन्द्रित रहँदै आएको छ ।
महिला, दलित, जनजाति, अल्पसङ्ख्यक, पिछडिएका वर्ग, कलाकारलगायतका समस्यालाई स्थान दिने हाम्रो नीति रहँदै आएको छ । हामीले सम्भव सबै विकल्पको प्रयोग गरेर विश्वभरि रहेका नेपालीका समस्याबारे बढीभन्दा बढी आवाज उठाउने, उहाँहरूका आवाजलाई बल पुर्याउन प्रयत्न त गर्दै आइरहेका छौँ नै, त्यसका साथसाथै माथि उल्लेख गरिएका विभिन्न विषयमा उहाँहरूको प्रतिक्रिया जान्ने, उहाँहरूसित छलफल/अन्तक्रिया गर्ने प्रयत्नमा पनि हामीले जुटिरहेका छौँ । त्यसो गर्नुको तात्पर्य हो, मातृभूमिबाट टाढा रहेका नेपालीलाई पनि आफ्ना देशका समस्याबारे बढी सजग, सचेत गर्न सकियोस् भन्नु नै हो ।
हामीले “युगदर्शन” साप्ताहिक प्रिन्ट संस्करणमार्फत पनि श्रमजीवी नेपालीको आवाजलाई समेट्दै आएका छौँ । युगदर्शनको वेबसाइटलाई अन्तर्क्रियात्मक मञ्चको रूपमा प्रस्तुत गर्ने जमर्को गर्दै आएका छौँ । हाम्रो त्यस प्रकारको प्रयत्नले विश्वभरि छरिएर रहेका देशभक्त, प्रजातान्त्रिक, वामपन्थी र क्रान्तिकारी नेपालीलाई आफ्ना समस्या, विचार, प्रतिभा, भावना पोख्ने चैतारी प्रदान गरेर थोरै भए पनि सञ्चार जगत्मा सहयोग पुर्याउने सक्यौँ भने हामीलाई खुसी लाग्ने छ ।
अन्तमाः देशको राजनीतिक यति बेला भयावह अवस्थातर्फ जाँदै गरेको देखिन्छ । २०६२–६३ सालको महान जनआन्दोलनबाट प्राप्त उपलब्धि रक्षात्मक अवस्थामा पुगेको छ । यो विषम परिस्थितिमा सम्पूर्ण प्रजातान्त्रिक शक्तिलाई साझा एजेन्डाअन्तर्गत नै किन नहोस्, एकताबद्ध बनाउनुपर्ने आवश्यकता छ । त्यसका साथै संविधान, गणतन्त्र र धर्मनिरपेक्षताको रक्षाका लागि लोकतन्त्रवादी शक्तिलाई एकजुट गराउने सवालमा पनि हामीले कलम चलाउनुपर्ने आवश्यकता बढेर गएको छ । यो विषम परिस्थितिमा हामीले छैटौँ वर्ष पार गरी साताँै वर्षमा प्रवेश गरेका छौँ । यो अवसरमा पुनः सम्पूर्णमा हार्दिक शुभकामना व्यक्त गर्दछौँ ।
