रामप्रकाश पुरी
‘युगदर्शन डटकमले’ नेपाली कम्युनिस्ट आन्दोलनको क्रान्तिकारी मिसन सञ्चालनको एउटा महान् र गौरवशाली अभियान बन्दै आएको छ । विगतका वर्षहरूझैँ यसले गत वर्षमा राष्ट्रियताको पक्षमा चलेको आन्दोलनलाई महत्वपूर्ण स्थान प्रदान गरेको छ । देशलाई विखण्डनको दिशातर्फ लागिरहेको सङ्घीयता विरुद्धको दर्शन, विचार, सिद्धान्त र राजनीतिलाई मुख्य केन्द्रमा राखेर समाचार सम्प्रेषण गरेको छ । प्रतिगमन विरुद्धको आवाजलाई लगातार सम्प्रेषण गरिरहेको छ ।
राज्य र सरकारका गलत कार्यशैली, भ्रष्ट प्रशासन, राजनीतिक भ्रष्टाचार, असन्तुलित र पक्षपातपूर्ण बजेट वितरण, शिक्षा र स्वास्थ्यमा भएको बेथिती र व्यापारीकरण आदिका विरुद्ध सशक्त भएर उभिएको छ । जातिवाद, क्षेत्रीयतावाद, विखण्डनवाद, सहकारी ठगी, तस्करी, महिलामाथि भएका हिंसाका विरुद्ध यसले सशक्त आवाज उठाएको छ । पत्रकारिताको मर्यादालाई पालना गर्दै आधिकारिक, स्रोतयुक्त, स्वतन्त्र र निष्पक्ष समाचार सम्प्रेषण गर्न सतर्क र सचेत रहँदै आएको छ ।
वर्तमानमा लोकप्रियतावादको चङ्गुलमा पर्दै गइरहेको परिस्थितिको प्रतिवाद गर्दै आएको छ । सत्य र तथ्यमा आधारित दर्शन, विचार, सिद्धान्त र राजनीतिको संस्कार कायम गराउन आफ्नो सङ्कल्पप्रति हामी सर्वदा अटल रहेका छौँ ।
भविष्यको गौरवमय यात्रामा हिँड्नका लागि वर्तमानमा स्वतःस्फूर्त कदम उठ्दैनन्, तिनलाई अविच्छिन्न आशा र गम्भीर विश्वासको शक्तिले भरिपूर्ण बनाउनुपर्दछ र तिनमा भविष्यको विजयलाई बुझ्ने चेतना भर्नुपर्दछ । ‘युगदर्शन’ डटकमका लागि पनि त्यही सत्य थियो । यो आफैमा समृद्ध र पूर्ण भएर प्रकट भएको थिएन, यसलाई समृद्ध बनाउने काम “हाँक” साप्ताहिकलाई साढे तीन दशकभन्दा बढी क्रान्तिकारी जीवन दिने कार्यमा समर्पित दर्शन, विचार र सिद्धान्तका हस्ताक्षरले गरेका थिए अनि हजारौँ पाठकको विश्वासद्वारा अनुमोदित भएर यो साँच्चिकै युगदर्शनको रुपमा विकास हुन सकेको सच्चाइप्रति हामी सचेत छौँ ।
भविष्य चुनौतीपूर्ण भए पनि निरन्तर गतिशील भएर अगाडि बढ्नुका विकल्प रहन्न । चुनौतीको सामना गर्नु यसको लागि सामान्य र स्वाभाविक छ । वर्तमानमा क्रान्तिकारी कम्युनिस्ट आन्दोलन गम्भीर सङ्कटमा परिरहेको बेलामा सतिसालझैँ भएर खडा हुनेहरूको महान् इतिहासलाई जीवन्त बनाउने ‘युगदर्शन’ डटकम आजको युगको अत्यन्त दुर्लभ सञ्चार अभियान हो । यसले उपेक्षा र पूर्वाग्रहको बलशाली वर्तमानको सामना गर्दै क्रान्तिकारी विचार, सिद्धान्त, दर्शन र राजनीतिको रक्षा गरिरहेको छ ।
‘युगदर्शन’ महान् र गौरवशाली बन्दै जानुमा यसमा प्रकाशित हुने ओजस्वी र तेजस्वी विचारको केन्द्रीय भूमिका रहेको छ । यो अभियान जनताको सहयोगमा जीवित रहेको अजेय र अमर अभियान हो । जबसम्म समाजमा वर्गीयता जीवित रहन्छ, तबसम्म यसले न्याय, स्वतन्त्रता र मुक्तिको पक्षबाट पैरवी गरिरहने छ । मिहिनेतकस जनताको भरोसालाई यसले ढल्न दिने छैन र क्रान्तिकारीलाई छिन्नभिन्न हुनबाट जोगाउनका लागि यो हरदम खडा हुनेछ । यसले वर्तमानको विघटन हुँदै गइरहेका विचलित परिवेशलाई चिर्दै सत्य र वास्तविकतातर्फ सम्पूर्ण मानवजातिलार्ई खिचेर लैजानका लागि महान् योद्धाको भूमिकामा आफूलाई अब्वल र अद्वितीय सावित गर्नेछ ।
हामीले आशा गर्दछौँ, क्रान्तिकारीको गर्जन भएर यसले आफ्नो यात्रा जारी राखिरहनेछ । देशको राष्ट्रियता, सार्वभौमिकता, स्वतन्त्रता र स्वाधीनताले भरिएको देशभक्ति चेतना र जागरण यसका मूल बनेर अविरल बगिरहनेछन् र देशलाई सधैँ आभार बनाइरहने छन् । साम्राज्यवादको बर्खिलापमा यसले विश्वका न्यायप्रेमी र शान्तिप्रेमी जनताको आवाजलाई गुञ्जित गरिरहनेछ ।
अन्तमा गौरवतापूर्वक घोषणा गर्दछौँ, हामी निडर, निर्धक्क र निःशर्त सत्यको पक्षमा उभिनेछौँ । युगदर्शनको अभियान सर्वदा देश र जनताको हितमा रहनेछ ।
