विष्णु शर्मा ##

कसैले शिर झुकायो भनेर मख्ख नपर्नू “आमा”
त्यहाँ खतरनाक स्वार्थ लुकेको हुन सक्छ
पछि गएर त्यही शिर ठाडो बनाएर
हजुरको अस्मिता लिलाम हुन सक्छ

कसैले धेरै माया गऱ्यो भनेर मख्ख नपर्नू “आमा”
उसको माया हजुरको अस्मिता लुट्न हुन सक्छ
कोही धेरै नजिक आयो भनेर नडराउनू “आमा”
उसको उद्देश्य हजुरलाइ जोगाउनु हुन सक्छ

एकैचोटि आउने आँधीको विश्वास नगर्नु “आमा”
त्यसले हजुरको सर्वस्व स्वाहा पार्न सक्छ
धेरैको भिडदेखि त्यसले जित्छ नभन्नू “आमा”
बिनायोजना खल्तीको भुइँमा झर्न सक्छ

घर ठुलो देखेर मिहिनेती नभन्नू “आमा”
उसले कालो धनले बनाएको हुन सक्छ
फुल देखेर सुगन्ध दिएको छ नभन्नू “आमा”
कुनै कुनै फूल गन्हाएको हुन सक्छ

कसैको बोलीमा शिष्टता देखेर नपत्याउनू “आमा”
उसको बोली र व्यवहारमा कसी लगाउनुपर्छ
कसैले चमत्कारले धन कमाइन्छ भनेर नपत्याउनू
त्यसको लागि त रगत पसिना बगाउनुपर्छ

साना साना कुरामा सतही नबन्नू “आमा”
जहिल्यै गहिराइमा पुगी निर्णय लिनुपर्छ
कसैले म तिम्रो सन्तान हुँ भन्यो भने नपत्याउनू
उसले हजुरको लागि ज्यान दिनुपर्छ