काठमाडौँ । अन्तर्राष्ट्रिय नेपाली एकता समाजले वर्तमान राजनीतिक समस्याको निकास संविधानको आधारमा खोज्नुपर्ने आवश्यकतामा जोड दिएको छ ।
अध्यक्ष शक्तमान बुढाथोकीको हस्ताक्षरमा २०८२ भदौ २६ गते बिहीबार जारी प्रेसवक्तव्यमा समाजले सो धारणा व्यक्त गरेको हो ।
समाजले २०७२ सालको संविधान जननिर्वाचित संविधानसभाले बनाएका कारण त्यसको विरुद्ध जान नहुने पनि बताएको छ ।
यस्तो छ, प्रेसवक्तव्यको पूर्ण पाठ :
“अन्तर्राष्ट्रिय नेपाली एकता समाज २०८२ भदौ २३ र २४ गतेको अकल्पनीय घटनापछि देशमा उत्पन्न परिस्थितिबारे गम्भीर चिन्ता व्यक्त गर्न चाहान्छ । जेनजी आन्दोलनको सन्दर्भमा उत्पन्न विषम राजनीतिक परिस्थितिमाझ त्यसको समाधान कसरी खोज्ने ? यो प्रश्न उब्जिएको छ ।
हाम्रो सङ्गठन नेपालको संविधान २०७२ को संविधानको आधारमा राजनीतिक निकास खोज्नुपर्ने आवश्यकतामा जोड दिन्छ । २०६२–६३
सालको जनआन्दोलनले लोकतन्त्र, गणतन्त्र, धर्मनिरपेक्षता, मौलिक अधिकार, समावेशिता र विकेन्द्रीयताको स्थापना गरेको थियो । अहिलेको अवस्थामा पनि लोकतन्त्र, गणतन्त्र र धर्मनिरपेक्षता त्यत्तिकै आवश्यक छ । २०७२ सालको संविधान जननिर्वाचित संविधानसभाले बनाएका कारण अहिले पनि त्यो जनमतको विरुद्ध जानुहुँदैन भन्ने हाम्रो सङ्गठनको मत रहेको छ ।
अन्तमा हामीले देशमा शान्तिसुव्यवस्था र लोकतन्त्रको रक्षाका लागि सजग हुन सम्पूर्ण नेपाली जनतासित आग्रह गर्दछौँ ।”
