खुम रायमाझी, महासचिव, कुवेत नेपाली एकता समाज
‘युगदर्शन’ साप्ताहिक आफ्नो छैटौँ वर्ष सफलतापूर्वक पूरा गरी २०८२ भदौ १८ गतेदेखि सातौँ वर्षमा प्रवेश गरेको अवसरमा हार्दिक बधाई तथा शुभकामना व्यक्त गर्दछौँ ।
‘युगदर्शन’ साप्ताहिकले सदैव सही, सत्य र तथ्यमा टेकेर अन्यायका विरुद्ध न्यायको पक्षमा समाचार, लेख र साहित्यको माध्यमबाट नेपाली जनतालाई सचेत र जागरुक बनाउन महत्त्वपूर्ण भूमिका खेल्दै आएको कुरा हामी सबैलाई सर्वविदितै छ । यति मात्र हैन, संसारभरि छरिएर रहेका नेपालीले भोग्नुपरेको दुःखकष्टलाई उजागार गर्दै सुधारका लागि समाचारको माध्यमबाट सम्बन्धित निकायलाई समेत ध्यानाकर्षण गराउँदै आएको छ।
अहिले एक्काइसौँ शताब्दीको समाज र सञ्चार जगत्समेत एक वा अर्को प्रकारले पुँजीवादको सिकार बन्दै त्यसकै पक्षपोषण गरिरहेको वर्तमान अवस्थामा राष्ट्रियता, जनतन्त्र र जनजीविकाको पक्षमा सही दृष्टिकोणका साथ तथ्यगत समाचार सम्प्रेषण गरेर छापापत्रिकालाई टिकाइराख्ने कम चुनौतीपूर्ण नै छ ।
‘युगदर्शन’ साप्ताहिकले त्यो चुनौतीलाई सफलतापूर्वक डटेर सामना गर्दै निरन्तर अगाडि बढिरहेको छ । यो हाम्रो लागि मात्रै नभई नेपाली समाजकै लागि गौरवको विषय हो ।
रोजगारीको लागि कुवेतमा कार्यरत नेपालीको गौरवशाली सङ्गठन कुवेत नेपाली एकता समाजको तर्फबाट यस खुसीको अवसरमा हार्दिक बधाई तथा आगामी वर्षमा अझै सशक्त र गर्विलो यात्राका लागि हामी प्रवासीको सदैव साथ रहनेछ र भविष्यमा थप सफलता मिल्दै जाउन् भन्ने शुभकामना व्यक्त गर्दछु ।
