घोराही । अखिल नेपाल जनजाति सम्मेलन घोराही नगर समिति आगामी भदौ २१ गते निर्धारित दाङ जिल्ला सम्मेलनको तयारीमा जुटेको छ ।
आगामी असोज २६–२८ गते चितवनमा हुन गइरहेको पाँचौँ राष्ट्रिय महाधिवेशन तयारीको सिलसिलामा २०८२ भदौ ७ गते शनिबार बसेको बैठकले सो निर्णयसमेत गरेको हो ।
नगर समितिका अध्यक्ष जितबहादुर पुनको अध्यक्षता तथा पूर्वकेन्द्रीय सदस्य रामबहादुर जिएम प्रमुख आतिथ्यमा सो बैठक घोराहीमा बसेको थियो ।
बैठकले आगामी असोज २० गतेसम्म वडासमितिको बैठक तथा भेला गरी समिति गठन/पुनर्गठन गरिसक्ने निर्णय भएको अध्यक्ष पुनले जानकारी दिनुभयो ।
उहाँका अनुसार घोराही नगरका वडा नम्बर १, २, ३, ७, १०, १३, १४, १७, १८ र १९ मा वडासमिति गठन/पुनर्गठन वा भेला गर्ने ठेगान भएको छ ।
नगर समितिका सचिव शेरबहादुर पुनका अनुसार बैठकमा दाङ जिल्ला अधिवेशन र पाँचौँ राष्ट्रिय महाधिवेशनमा सहभागिताससँगै समसामयिक राजनीतिक र साङ्गठनिक विषयमा समेत छलफल भएको थियो ।
