काठमाडौँ । नेकपा (मसाल) का महामन्त्री मोहनविक्रम सिंहले चीन विरुद्ध दलाई लामालाई तिब्बतमा पुनर्स्थापना गर्न एमसिसी उपयोग हुन सक्ने चेतावनी दिनुभएको छ ।
२०८२ भदौ ८ गते आइतबार राजधानीको लाजिम्पाटमा सम्पन्न “एमसिसीले नेपाललाई के दिन्छ : पाठ र शिक्षा” विषयक संवाद कार्यक्रममा मन्तव्य राख्दै उहाँले यस्तो दाबी गर्नुभएको हो ।
एमसिसी गम्भीर विषय भएको बताउँदै उहाँले त्यसअन्तर्गत नेपालमा ट्रान्समिसन लाइन, सडक निर्माण यसको बाह्य पक्ष भएको बताउनुभयो ।
अमेरिकाले विश्वका कैयौँ देश, जहाँ उसको रणनीतिक महत्त्व देखिन्छ, त्यहाँ एमसिसीलाई कार्यान्वयन गर्ने प्रयत्न गरेको बताउनुभयो ।
‘चीन र अमेरिकाको माझमा युद्ध हुँदा नेपाल युद्धभूमि बन्नेछ’ एमसिसीको गम्भीर रणनीतिक लक्ष्य भएको बताउँदै उहाँले भन्नुभयो– ‘चीनका विरुद्ध दलाई लामालाई तिब्बतमा पुनर्स्थापना गर्न खोज्दा उनीहरूमाझ युद्ध हुन सक्छ । तिब्बतमाथि आक्रमण गर्ने क्रममा युद्धभूमि नेपाल नै बन्नेछ, अर्को कुनै विकल्प छैन ।’
महामन्त्री सिंहले यदि नेपाल युद्धभूमिमा बदलियो भने कस्तो अवस्था निर्माण हुनेछ भन्ने सन्दर्भमा तत्कालका लागि युक्रेन र गाजापट्टीको उदाहरणबाट सिक्न सकिने बताउनुभयो ।
गाजापट्टीमा उपचार, राहत, स्वास्थ्योपचारजस्ता आधारभूत मानवीय कार्यमा समेत इजरायलले आक्रमण गरेको सन्दर्भ उहाँले मन्तव्यमा उल्लेख गर्नुभयो ।
‘एमसिसीबाट नेपालको स्वतन्त्र परराष्ट्रनीति समाप्त हुनेछ नै । कुरा त्यति मात्रै होइन’ एमसिसीको चौतर्फी असरबारे जानकारी दिँदै उहाँले भन्नुभयो– ‘एमसिसीले नेपालको राष्ट्रियता, सार्वभौमिकता मात्रै नभएर विश्वशान्तिको सामु गम्भीर खतरा उत्पन्न गरेको छ ।’
उहाँले एमसिसीको सन्दर्भमा विश्वशान्तिका लागि युद्ध, महायुद्ध र आणविक खतराका विरुद्ध आवाज उठाउनु विश्वभरिका शान्तिप्रेमी नागरिकको कर्तव्य भएको बताउनुभयो ।
त्यसका लागि कम्युनिस्ट/गैरकम्युनिस्ट, वामपन्थी/गैरवामपन्थीको भेदभाव नगरीकन विश्वभरिका शान्तिकामी जनतामाझ मोर्चाबन्दी हुनुपर्ने बताउनुभयो ।
मन्तव्यको क्रममा उहाँले नेपालमा पुराना राजनीतिक दलहरूले अमेरिकाको पूर्ण हितमा काम गर्न नसकेकाले नयाँ दलको खोजी गरिरहेको पनि बताउनुभयो ।
‘पुराना दलको अमेरिकापरस्त नीति त छ नै’ उहाँले भन्नुभयो– ‘तर त्यतिले मात्रै पुगेन, अब उसलाई अमेरिकाको प्र्रत्यक्ष निर्देशनमा चल्ने राजनीतिक पार्टी चाहिएको छ । यतिखेर त्यसको खोजी अमेरिकाले गरिरहेको छ ।’
सङ्क्षिप्त मन्तव्यको क्रममा उहाँले एमसिसीलाई संसद्बाट पारित गर्नुले नै यसको गम्भीरतालाई बुझ्न सकिने बताउनुभयो ।
‘सन्धिसम्झौतालाई संसद्बाट पास गर्नुपर्दैन तर नेपालबाट किन एमसिसी पास गरियो ?’ महामन्त्री सिंहले भन्नुभयो– ‘संसद्बाट पारित गरेपछि त्यो कानुन बन्यो । नेपालको संविधान र कानुनसँग बाझिएको हदसम्म एमसिसी सदर भयो । यसले एमसिसी नेपालको राष्ट्रिय र सार्वभौमिकताको विरुद्ध रहेको पुष्टि हुन्छ ।’
उहाँले प्रारम्भमा नेपालमा एमसिसीको विरुद्ध व्यापक रहेको बताउँदै पछिल्लो समयमा सत्तानिकट कैयौँ राजनीतिक दलले सम्झौता गरेको पनि स्मरण गर्नुभयो ।
पूर्व प्रधानमन्त्री झलनाथ खनाल प्रमुख अतिथि रहनुभएको सो कार्यक्रमको आयोजना फाउन्डेसन फर पिस डेभलोपमेन्ट एन्ड सोसिलिज्मले गरेको थियो ।
काष्ठमण्डप डायलग–२ नाम दिइएको उक्त कार्यक्रम भोलिसम्म चल्नेछ ।
