प्रकाश थापामगर/गोविन्दकुमार शर्मा, काठमाडौँ ।

राष्ट्रिय जनमोर्चाका केन्द्रीय सदस्य राजेन्द्र ढुगानाले भ्रष्टाचार निरुत्साहित गर्नमा राजमोका जनप्रतिनिधिको योगदान रहेको दाबी गर्नुभएको छ ।

युगदर्शन मिडियालाई २०८२ साउन २५ गते आइतबार भिडियो अन्तर्वार्ता दिँदै उहाँले सो दाबी गर्नुभएको हो ।

उहाँले भन्नुभयो– ‘भ्रष्टाचार नियन्त्रण र निरुत्साहन गर्नमा राष्ट्रिय जनमोर्चाका प्रतिनिधिको योगदान छ ।’

राजमोको नेतृत्व रहेका पालिका भ्रष्टाचार न्यूनीकरण, रोजगारी सिर्जना, कृषि तथा स्वास्थ्यजस्ता क्षेत्रको कार्यसम्पादनमा अब्वल रहेको उहाँको दाबी थियो ।

त्यस क्रममा उहाँले अर्घाखाँचीको भूमिकास्थान नगरपालिकाले लिजा प्रतिवेदनमा प्रथम स्थान हासिल गरेको, बरेङ गाउँपालिका प्रधानमन्त्री स्वरोजगार कार्यक्रममा प्रथम स्थानमा रहेको, जैमिनी नगरपालिका राजस्व चुहावट, भ्रष्टाचार नियन्त्रण, कृषिमा आत्मनिर्भरता र स्वास्थ्य सेवाजस्ता क्षेत्रमा उदाहरणीय रहेको उहाँको भनाइ थियो ।

त्यस क्रममा राजमोको नेतृत्व रहेका बागलुङ, प्युठान र अर्घाखाँचीका पालिकामा बेरुजु अन्यत्रभन्दा कम रहेको उहाँको दाबी थियो ।

यही साउन २० गतेदेखि २७ गतेसम्म राजमोले भ्रष्टाचारको विरुद्धमा देशव्यापी आन्दोलन गर्ने घोषणा गरेको सन्दर्भ जोड्दै उहाँले राजमो केन्द्रीय कार्यालयले देशैभरिका भ्रष्टाचारसम्बन्धी प्रतिवेदन तयार पारेकोसमेत जानकारी दिनुभयो ।

कर्मचारीतन्त्र भ्रष्ट

अन्तर्वार्ताको क्रममा नेता ढुङ्गानाले देशका कर्मचारीतन्त्र भ्रष्ट भएकाले पनि भ्रष्टाचार बढिरहेको विचार व्यक्त गर्नुभयो ।

‘कर्मचारीतन्त्र ह्रस्व, दीर्घ र कमामा खेल्छ । कुलिङ पिरियड प्रकरणमा यसबारे प्रष्टै देखियो’ उहाँले भन्नुभयो– ‘ब्युरोक्रेसी नैतिकवान, चरित्रवान् भए भ्रष्टाचार रोकिन सक्छ ।’

उहाँले भ्रष्ट कर्मचारीले जनप्रतिनिधिलाई पनि फसाउन सक्ने भएकाले राजनीतिक दलका नेता पनि इमानदार, उच्च नैतिकवान् र चरित्रवान् हुनुपर्ने बताउनुभयो ।

जैमिनी नगरपालिकाको कार्यसम्पादन

राजमो बागलुङका अध्यक्षसमेत रहिसक्नुभएका नेता ढुङ्गानाले जैमिनी नगरपालिकामा राजमोको कार्यशैलीबारे केही विस्तारमा चर्चा गर्नुभयो ।
‘जैमिनी नगरपालिकामा राजमोबाट निर्वाचित मेयरले पालिकाले दिने सुविधाबाहेक केही लिनुभएको छैन’ उहाँले भन्नुभयो– ‘मेयरले अहिलेसम्म एनजिओलगायत विभिन्न सङ्घसंस्थाबाट बैठकभत्ता वा अन्य कुनै पनि आय लिनुभएको छैन ।’

जैमिनीका मेयरको भनाइ उद्धृत गर्दै उहाँले भन्नुभयो– ‘जब राज्यलेले जीविकोपार्जनका लागि आयश्रोतको व्यवस्था गरिदिएको छ भने अन्यत्रका किन रकम बुझ्ने ?’

यस क्रममा जैमिनीका मेयरले खाना पकाउने भान्छे नराखेको, खालि ड्राइभर मात्रै राखेको, महिनाभरिका लागि छुट्याइएको ९० लिटर तेल मात्रै उहाँले प्रयोग गरेको र निजी काममा पालिकाको वाहन प्रयोग नगर्ने गरेको उहाँले जानकारी दिनुभयो ।

त्यस्तै, जैमिनी पालिकाले किसानलाई आत्मनिर्भर बनाउन कृषि एम्बुलेन्समार्फत् कृषिउपज खरिद गरी विक्रीवितरण गरेको, हलगोरु पाल्नेलाई अनुदान दिएको र दीर्घरोगीलाई विभिन्न स्वास्थ्यसुविधा दिएको उहाँको दाबी थियो ।

नेता ढुङ्गानाले बागलुङका काठेखोला र बडिगाड गाउँपालिकाका उपाध्यक्षले अध्यक्षसित टसल नगरीकन काम गरेको बताउनुभयो ।

सोही स्थिति प्युठानका राजमोले जितेका पालिकाको पनि भएको उहाँले जानकारी दिनुभयो ।

बागलुङमा राजमोको सङ्गठन

अन्तर्वार्ताको क्रममा उहाँले बागलुङमा राजमोको व्यापक जनमत रहेको दाबी गर्नुभयो ।

‘सत्ता र शक्ति प्रयोग गरेर हामी र हामीलाई समर्थन गर्ने जनतामािथ आक्रमण गरिन्छ, हामीलाई घेराबन्दी गरिन्छ’ उहाँले भन्नुभयो– ‘तर पनि बागलुङका जनताले हामीलाई साथ दिइरहेका छन् । त्यसका लागि बागलुङे जनतालाई म स्यालुट गर्न चाहान्छु ।’

राज्य र माओवादीको दश वर्षे सशस्त्र द्वन्द्वका बेला आफूहरू मात्रै गाउँमा बाँकी रहेको स्पष्ट पार्दै उहाँले भन्नुभयो– ‘त्यतिखेर हामीले राज्य र माओवादीको ज्यादतीबाट जनतालाई बचाएका थियौँ । त्यति बेला बागलुङे जनता लाइन लागेर राजमोको सदस्यता लिने गर्दथे ।’

उहाँले थप्नुभयो– ‘अहिले पनि पार्टीले आह्वान गर्ने आन्दोलनको अग्रपङ्क्तिमा उभिने जनशक्ति बागलुङमा तयार छ ।

भदौको बैठकले वार्षिक कार्यक्रम तय गर्ने

नेता ढुङ्गानाले आगामी भदौ २० र २१ गते राजमोको केन्द्रीय समितिको बैठक बस्ने र त्यसले वार्षिक कार्यक्रम बनाउने बताउनुभयो ।

राजमोको राष्ट्रिय सम्मेलन गर्ने मिति नजिकिँदै आइरहेकाले त्यसको तयारीमा सो बैठक केन्द्रित रहने उहाँले जानकारी दिनुभयो ।

उहाँले भन्नुभयो– ‘राष्ट्रिय सम्मेलनको तयारीसँगै विभिन्न सङ्घर्षको कार्यक्रम समेटेर हामीले वार्षिक कार्ययोजना बनाउनेछौँ ।’

(अन्तर्वार्ताको पूर्ण पाठका लागि युगदर्शन मिडियाको युट्युब च्यानल https://www.youtube.com/watch?v=RuewND1v5_A वाच गर्न अनुरोध गरिन्छ)