काठमाडौँ । राष्ट्रिय जनमोर्चाका केन्द्रीय सदस्य राजेन्द्र ढुङ्गानाले देशमा भ्रष्टाचारको गम्भीर अवस्थाबारे व्यङ्ग्य गर्दै भन्नुभएको छ– ‘भ्रष्टाचार कहाँ हुन्न भनेर खोज्नुपर्ने अवस्था छ ।’
राजमो काठमाडौँद्वारा २०८२ साउन २४ गते शनिबार चाबहिलचोकमा आयोजित सभालाई सम्बोधन गर्दै उहाँले सो अभिव्यक्ति दिनुभएको हो ।
‘एकथरीले कानुनी संरचनाभित्रै भ्रष्टाचार हुने गरेको छ, अर्काथरीले कानुनबाहिर भ्रष्टाचार गरिरहेका छन्’ उहाँले भन्नुभयो– ‘देशमा भ्रष्टाचार कहाँ, कसले गरेको छैन भनेर खोज्नुपर्ने अवस्था छ ।’
उहाँले संविधान र कानुनमा भ्रष्टाचार रोक्न प्रशस्त व्यवस्था गरिएको बताउँदै उहाँले तालुकवाला निकाय नै भ्रष्टाचारमैत्री भएको धारणा राख्नुभयो ।
‘भ्रष्टाचार न्युनीकरण गर्नका लागि अख्तियार दुरुपयोग अनुसन्धान आयोग छ । अर्कातिर, महालेखा परीक्षाक र सम्पत्ति शुद्धीकरण आयोग पनि छ’ उहाँले आरोप लगाउनुभयो– ‘अख्तियारले भ्रष्टलाई पहिले नै खबर गर्छ । महालेखा परीक्षकको मुखमा बुजो लगाउन पहिले नै रकम छुट्याइन्छ । सम्पत्ति शुद्धीकरण आयोगको त अध्यक्ष नै भ्रष्टाचारको आरोप खेपिरहेका छन् ।’
भ्रष्टाचार रोक्न गठित निकाय नै भ्रष्टाचारमा सामेल भएपछि अदालत एउटा विकल्प भएको बताउँदै उहाँले भन्नुभयो– ॅहामीकहाँ न्यायालय पनि भ्रष्ट छ ।’
सेना, पुलिस अनुशासित सङ्गठन मानिए पनि त्यहाँ पनि ठेक्कापट्टामा भ्रष्टाचार भएको उहाँको भनाइ थियो ।
नेता ढुङ्गानाले भ्रष्टाचार निर्मूल गर्न सार्वभौम जनता नै उठ्नुपर्ने तर्क अगाडि सार्नुभयो ।
राष्ट्रिय जनमोर्चाले भ्रष्टाचार विरुद्धको आन्दोलनमा नेतृत्व गर्न चाहेको उहाँको दाबी थियो ।
लोकतन्त्रका लागि लडेकाहरू नै भ्रष्ट : पुन
सभामा मन्तव्य राख्दै अखिल नेपाल महिला सङ्घकी अध्यक्ष मीना पुनले लोकतन्त्रका लागि लडेकाहरू नै भ्रष्ट भएको धारणा व्यक्त गर्नुभयो ।
‘हिजो लोकतन्त्र, गणतन्त्रका लागि जुन जुन शक्तिहरू लडेका थिए, तिनै अहिले भ्रष्ट सावित भएका छन्’ उहाँले भन्नुभयो ।
‘त्यसको अर्थ यो होइन, हिँजोका राजावादी निष्कलङ्क थिए, तिनीहरू पनि भ्रष्ट थिए’ नेतृ पुनले भन्नुभयो– ‘उनीहरू निरङ्कुश हुनुका साथै भ्रष्टसमेत भएकाले २०४६ साल र २०६२–६३ सालको जनआन्दोलनले तह लगाएको थियो ।’
देशमा जताततै भ्रष्ष्टाचार रहेको उहाँको दाबी थियो ।
उहाँले भन्नुभयो– ‘कहाँ छैन भ्रष्टाचार ? स्थानीय तहदेखि सङ्घीय सरकारसम्म, राजनीतिक दलका नेतादेखि कर्मचारीसम्म जताततै भ्रष्टाचार छ ।’
भ्रष्टाचार सर्वव्यापी भएकाले नेपाली जनतामा लोकतन्त्रवादी पनि उस्तै हुन् भन्ने भ्रम उत्पन्न भएको उहाँको विश्लेषण थियो ।
भ्रष्टाचारको विरुद्ध राष्ट्रिय जनमोर्चाले सञ्चालन गरेको अभियानलाई अगाडि बढाउनुपर्ने आवश्यकतामा उहाँले जोड दिनुभयो ।
कार्यक्रममा अखिल (छैठौं) की केन्द्रीय कोषाध्यक्ष समष्टि बुढामगरले व्यङ्ग्यात्मक कविता “मिसन २०८४” सँगै मन्तव्य राख्नुभएको थियो ।
राजमो काठमाडौँका अध्यक्ष झविन्द्र बेलबासेको अध्यक्षता तथा सल्लाहकार लक्ष्मणदेव पाण्डेको सञ्चालनमा अघि बढेको उक्त कार्यक्रममा उपस्थित जनसमुदायलाई जिल्ला समितिका सचिव छवि खनालले स्वागत गर्नुभएको थियो ।
