भक्त बिश्वकर्मा
टनकपुर महाकाली सन्धिमा
चिप्लिएको सरकार
गण्डक र कोसी सम्झौतामा
राष्ट्रघात गरेको सरकार
छोडेनौ चिप्लीन अपरकर्णाली
र गण्डक सम्झौता समेतमा
सत्ता टिकाउन र कुर्सी
बचाउनकै लागी
बार बार चिप्लिदा
तिम्रो स्वार्थ त पुरा भयो
तर जनता व्याकुल भए
भोग रोग र वेरोजगारीको
व्यथाले च्यापी
विश्वका गल्ली गल्लीमा
रगतसँग पसिना साट्दैछन्
घरको छानो टाल्न
एक छाक भात खान
जोहो गर्ने नेपालीले भन्दैछन्
अव त केही गर सरकार
भ्रष्टचार माफियाकरण
कालो बजारी नातावाद
क्रिपावाद वन्द गर्दा कसो होला
योग्यता अनुसारको काम
र काम अनुसारको दाम
जनतालाई व्यवस्था गर्दा कसो होला
नेपाली आमाको छातीमा
विदेशीले कुल्चीदा
चुप बसेर चिप्लीएको बेला
सयौं भूभागमा सीमा मिचिँदा
कानमा तेल हाल्दै
आर्शिवाद थाप्दै बस्ने
लाचार सरकार
अब त केही गर्दा
बन्द उधोगधन्दा खोली
रोजगार दिँदा
शिक्षा स्वास्थ्यको व्यवस्था गर्दा
आत्म निर्भर देश र जनता हुँदा
सगरमाथा झैँ उच्च
शिर नेपालीको होस
गद्दारहरुलाई जेल कोच्दा कसो होला
सुन फल्ने देशमा
चामल माग्ने जनता बनायौ
अधिकार खोज्ने, समुन्नत समाज
माग्ने सयौंलाई गोली हान्यौ
व्यवस्था परिवर्तन हुँदा पनि
अवस्था परिवर्तन नहुँदा
जनतामा निरासा छायो
सत्ता र शक्तिको आडमा
कुकर्म गर्नेहरु रमाईरहेछन्
देश कंगाल पारिरहेछन्
गुण्डाराज चलाई रहेछन्
अकूत सम्पती विदेशी बैंकको
लकरमा राख्दा
देश चलाउनेहरु
फेरि चिप्लियौ
देशलाई नै चिप्लायौ
अब त केही गर सरकार
स्वाभिमानी नेपाल र नेपालीलाई
समुन्नत गोरेटोमा
डोर्याउने पदयात्रा
शुरु गर्दा कसो होला
कालापानी लिपुलेक
फिर्ता लिँदा कसो होला सरकार
नेपाललाई फेरि एमसीसीको
फन्दामा पारि नचिप्लि सरकार
अब अस्तित्व बचाउनु पर्छ
इतिहासमा सुनौलो अक्षर राख्दा
सन्तानलाई जस्ताको जस्तै
देश हस्तान्तरण गर्दा
कति राम्रो होला
पुर्खा जसरी वीर थिए
हामी पनि वीरका सन्तान
बन्न पाउँदा
देश समृद्ध अटल र
स्वाभिमानी हुँदा जनता कति खुसी
होलान त्यसैले अब त नचिप्ली
सरकार नचिप्लि सरकार !!