खलङ्गा । राष्ट्रिय जनमोर्चा माण्डवी गाउँ समितिले विद्युत् प्रभावित क्षेत्रका वासिन्दालाई सुविधा दिन माग गर्दै माण्डवी नगरपालिका र बुटवल पावर कम्पनीमा ज्ञापनपत्र बुझाएको छ ।
राजमो गाउँ समितिका अध्यक्ष लिलबहादुर राउत नेतृत्वको प्रतिनिधिमण्डलले २०८२ साउन ५ गते सोमबार सो ज्ञापनपत्र बुझाइएको हो ।
सात बुँदे सो ज्ञापनमा साविक नयाँगाउँ गाउँ विकास समितिको वडा नं. ४, ५, ६, ७, ८ र ९ लाई पालिकाको वडा नम्बर ३ दारिमचौरस्थित १२ मेगावाट विद्युत् परियोजनाको प्रभावित क्षेत्र घोषणा गरिएकोमा हाल सो घोषणाबाट हटाउँदा बारम्बार विद्युत् कटौती हुने गरेकाले विद्युत् आपूर्ति सहज गर्न माग गरिएको छ ।
त्यस्तै बजारक्षेत्रमा सडकबत्तीको व्यवस्था यथाशीघ्र गरिनुपर्ने, रुखनजिक रहेका नाङ्गो तारबाट उत्पन्न खतरा अन्त गर्न रुखका हाँगा काट्नुपर्ने, प्रभावित क्षेत्रमा थ्री फेज लाइन वितरण गर्नुपर्ने र ३ नम्बर वडा लामाचौरमा रहेको विद्युत् महसुल केन्द्रको हिसाबकिताब पारदर्शी नभएकोमा लेखापरीक्षण गरिनुपर्ने माग राखिएको थियो ।
गाउँपालिकामा सो ज्ञापन बुझाउन गाउँ समितिका अध्यक्ष लिलबहादुर राउत, राजमो जिल्ला सचिवालय सदस्य लालबहादुर राउत, जातीय समता समाजका महासचिव खगेश्वर सुनार, राजमो गाउँ समितिका सचिव चन्द्रबहादुर केसी र गाउँ समितिकै सदस्य नरेन्द्र खड्कासहितको प्रतिनिधिमण्डल पालिका कार्यालय जसपुर पुगेको थियो ।
त्यस्तै, पालिकास्थित बुटवल पावर कम्पनीको कार्यालयमा ज्ञापन बुझाउन राजमो प्युठानका अध्यक्ष ज्ञामुराम न्यौपाने, अखिल नेपाल युवक सङ्घका केन्द्रीय कोषाध्यक्ष कमल पौडलेसहित पालिकाको टोली पुगेको थियो ।
ज्ञापनपत्र समता समाजका महासचिव खगेश्वर सुनारले वाचन गर्नुभएको थियो ।
