कलैया । संविधानसभा सदस्य एवम् नेपाली कांग्रेसका नेता रामअयोध्या प्रसाद यादवको ७२ वर्षको उमेरमा निधन भएको छ । बाराको सुवर्ण गाउँपालिका– २ कवहीजगात निवासी यादवको बुधबार बिहान वीरगन्जस्थित हेल्थकेयर अस्पतालमा उपचारका क्रममा निधन भएको बताइएको छ ।

यादव मधुमेहबाट पीडित थिए । यादवको स्वास्थ्य अवस्था जटिल बनेपछि अस्पताल भर्ना गरिएको उनका पारिवारिक श्रोतले बताएको छ ।

यादव २०७० सालमा सम्पन्न दोस्रो संविधानसभा निर्वाचनमा बारा क्षेत्र नम्बर १ बाट निर्वाचित भएका थिए । यादव नेपाली कांग्रेस बाराका पूर्व जिल्ला सचिव तथा पार्टीको महासमिति सदस्य थिए ।

यादवका दुई छोरा, दुई छोरी र श्रीमती छन् । पारिवारिक स्रोतका अनुसार उनको अन्त्येष्टि बुधबार दिउँसो १ बजे आफ्‌नै गाउँ कवहीमा गरिने बताइएको छ ।